Претседателот и врховен командант на вооружените сили на државата Стево Пендаровски денеска изврши обиколка на позициите на Армијата стационирани на јужната граница на државата каде истакна дека не е регистриран поголем број на илегални мигранти, освен вообичаените за овој период од годината. Подвлече дека државата будно ја следи ситуацијата со мигрантите на турско-грчката граница и ги презема сите мерки во случај на ексалирање на состојбата, што може да се одрази и на земјава.
,,Од пред два дена, можам да ви кажам дека и армискиот контингент тука го зголемивме, не можам да зборувам за бројки бидејќи тоа се класифицирани информации, меѓутоа го зголемивме. Не во очекување на некој голем бегалски бран, меѓутоа во очекување на тоа што евентуално може да се случи, да не не фати неподготвени. Знам дека истото се случува и со единиците на вработените од МВР”, истакна претседателот Пендаровски кој рече дека зголемен е и бројот на припадниците на Фронтекс
Претседателот Пендаровски на јужната граница го посети и Транзитниот центар Винојуг – Гевгелија кадешто се врши регистрација на мигрантите коишто во Северна Македонија влегуваат од Грција. Одговорните лица во Транзитниот центар го информираа претседателот Пендаровски дека центарот е целосно подготвен за прифаќање и привремен престој на мигранти.
Во моментов во Центарот престојува само едно семејство од Авганистан. Според одговорните лица, Транзитниот центар истовремено има и хуманитарен карактер, односно згрижува луѓе со социјално загрозен статус. Во центарот во континуитет се присутни претставници на Црвениот Крст, УНХЦР и доктори коишто им пружаат неопходна помош и поддршка на лицата коишто се привремено сместени тука.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
