Ќе се гради фекална и атмосферска канализација во Градско Балдовци – струмичка фирма го доби тендерот

518

Ќе се гради фекален и атмосферски канализационен систем во во населеното место Градско Балдовци во Општина Струмица откако министерството за транспрот и врски склучи договор со струмичката фирма „Жикол“ во вредност од милион и 376 илјади евра или околу 84,6 милиони денари со ДДВ. Договорот е склучен месецов и се чека градежната фирма во наредниот период да ги обезбеди потребните документации и да ги отпочне работите за изведба на системот кои треба да се реализира во наредните три години.  „Жикол“ го доби тендерот откако на јавната аукција преку системот на Бирото за јавни набавки, понуди најниска цена. Тие понудија околу 71,7  милион денари без ДДВ, скопската фирма „Конструктор“ понуди 72,1 денари додека третата фирма „Вардар Градба“ 102 милиони денари без ДДВ.

Според објавената документација, фекалниот канализационен систем во Градско Балдовци ќе биде решен преку пет главни колектори на кои ќе се приклучуваат секундарните канали. Вкупната должина на сите колектори изнесува  6 862 метри а на мрежата се предвидени да се постават 169 ревизиони шахти. Фекалниот колекторски систем ќе ги опфати сите улици согласно Урбанистичкиот план на Градско Балдовци и ќе овозможи приклучок на сите корисници а отпадните води гравитационо ќе се одведуваат до Пречистителната станица кај Сачево.

Атмосферскиот канализационен систем е димензиониран да ја прифати атмосферската вода од целокупниот урбан опфат на селото, како и надворешните површински води преку колектори и отворени канали која ќе се спроведува  до реципиентот река Тркајна. Атмосферската вода од урбаниот опфат на селото ќе се зафаќа преку 8 колектори со вкупна должина од 2 363 метри.

Градско Балдовци брои околу 240 домакинства и е проврзано на водоводниот систем на Струмица со кој стопанисува Комуналното претпријатие. Фекалниот канализационен систем се планира да се поврзе на Пречистителната станица за отпадни води на град Струмица.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.