Римските терми во Бања Банско кои потекнуваат од античкиот период ќе бидат заштитени од надворешните атмосферски влијанија. Со пари од ЕУ од Програмата за прекугранична соработка со соседна Грција, ќе се гради челична кровна конструкција над целиот локалитет кој за првпат е откриен во 1978 година. Римските терми во Бања Банско каде се откриени десетина простории на околу 1 000 метри квадратни, се едни од ретките сочувани римски споменици од ваков вид во Европа.
„Таму покрај челичната конструкција се предивдени и други активности. Се планира подигање на потпорни ѕидови, поставување инфо пунктови за туристи кои ќе доаѓаат за посета, потоа изградба на патеки внатре каде што ќе се движат посетителите за да се запознаат со оваа кутлурно населедство а исто така е предвидено и поставување фотоволтаици кои ќе го снабдуваат со електрична енергија локалитетот„ кажа директорот на Завод и музеј Струмица Бранко Ѓорѓиев.
Во моментов течат тендерските постапки за избор на изведувачи кои ќе пристапат на реализација на сите предвидени активности. Во проектот освен струмичкиот вклучен е и музејот од Кукуш Грција и Цис Палермо до Скопје. Вкупната вредност на проектот „Антички Европос – Дојранско Езеро – Римски терми Банско: Преминување на границите за одржлива култура и туризам“ изнесува околу милион и 300 илјади евра за двете држави. За македонската страна се предвидени околу 420 илјади евра а целиот прокет треба да се заокружи до август 2027 година. Директорот Бранко Ѓорѓиев вели дека поставувањето челична конструкција и изградбата на патеките во внатрешноста на Римските терми, нема да ја наруши автентичноста на целиот локалитет.
,, Челичната конструкција ќе биде поставена на 10 точки кои се внимателно одбрани за да не се наруши автентичноста или пак некоја просторија на локалитетот. На тие 10 точки нема некои подни мозаици или други археолошки остатоци. Со заокружување на оваа инвестиција очекуваме пред се поголем број туристи на овој локалитет не само од земјава туку и од странство“, кажа Ѓорѓиев
Целта на овој прекуграничен проект е да се спои културата, историјата и заедниците од двете страни на границата и да се искористи културното и природното наследство за ревитализација на локалните економии и потикнување на иновациите и туризмот на линијата Струмица – Дојран – Кукуш. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
