Постигнати високи цени на јавното наддавање за 14 те парцели во Дојран за викендици – m² стасал и до 120 евра

1491

Општина Дојран треба да инкасира околу 300 илјади евра откако продаде 14 парцели за изградба на викендици во населбите Калдрма и Карач кои се наоѓаат мегу Стар и Нов Дојран. На одржаното јавно наддавање за купување на парцелите се пријавиле дури 150 лица кои учествувале за добивање на една од  парцелите кои се со површина од околу  500 метри квадратни .

Најголем интерес предизвикала парцелата за викенд куќа во населбата Карач со површина од 474 метри квадратни за која се понуди цена  од 57 илјади евра  или 120 евра за метар квадратен. Атрактивните парцели кај Калдрма достигнале цена и до 30 илјади евра за 500 квадратни метри.

Првиот човек на Дојран Анго Ангов изрази задоволство од јавното наддавање имајки во предвид дека општината за првпат организира продажба на државно неизградено земјиште.

,, На продажба беа објавени 13 парцели кај населбата Калдрма и една во Карал со вкупна површина од 8 400 метри квадратни. Сите се успешно продадени и како општина треба да добиеме 18, 5 милиони денари доколку кандидатите ги уплатат средствата во рок од 15 дена. Во просек цената по метар квадратен стаса на 36 евра. Обезбедените средства ќе се искористат за инфраструктурни проекти кои граѓаните на општина Дојран ги побараа и ги утврдија како приоритетни,, објави градоначалникот на Дојран Ангов

Освен за изградба на викендици, општина Дојран објави продажба по пат на јавно наддавање и на други десетина парцели за комерцијални објекти со намена за угостителство, трговија, времено сместување и мали комерцијални објекти. Продажбата треба да се реализира во првата половина од месец декември.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.