Општина Дојран набави пловен багер за да го чисти езерото од отпад на местата каде има плажи (фото и видео)

1218

Општина Дојран со средства од ЕУ обезбедени од Програмата за прекугранична соработка со соседна Грција, набави сувоземено-пловен багер ,,Амфибија’’ за собирање на отпад . Ова е прв пловен багер набавен во нашава земја кој има за цел заштита на квалитетот на водите во Дојранското езеро. Како што не информираше градоначалникот Анго Ангов ова пловно возило е набавено преку проектот ,,Интегриран систем на управување со екосистемот на Дојранското Езеро’’ откако општина Дојран аплицираше пред европските фондови со партнери од грчка страна за заштита на Дојранското езеро

,, Со Амфибијата ќе стопанисува комуналното претпријатие, за што тим од неколку луѓе во овој период ќе се обучуваат како да работат со возилото и нашите проекции се да работи постојано овој пловен багер кој ќе го собира ѓубрето и остатоци од бујна вегетација кои се појавува на местата каде има плажи. Нашата замисла е ова пловно возило да работи во текот на целата летна туристичка сезона во утринските часови за да се овозможи заштита на езерото пред се на местата каде има плажи  каде посетители ќе се капаат,, ни изјави градоначалникот Ангов

Општинските власти денеска го тестираа ова возило со кое се очекува подобар квалитет на водата во езерото. Од таму велат дека општината ќе продолжи да работи во насока на подобрување на квалитетот на водите на Дојранското Езеро, овозможувајќи им на граѓаните да го остварат своето загарантирано право на здрава животна средина.

Со проектот од грчка страна се изврши уредување на каналот кој со години беше запуштен со што се очекува да се регулира и нивото на водата во езерото.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.