Како да стигнеме до одржлив развој во руралните заедници – Рурална Коалција ги презентираше резултатите

308

Земјоделското производство секоја деценија се намалува за 6%. Од друга страна Ковид пандемијата ги намали приходите од земјоделските активности во некои региони дури за 60% согласно теренските истражувања на Рурална Коалиција. Жените од руралните средини не беа вклучени во ниту една мерка од економските пакети на Владата за излез од Ковид 19 пандемијата, а оваа година се соочуваме со скапи репроматеријали, недостиг на храна и суровини, намалување на површините кои што се обработуваат.

И токму Рурална Коалиција изминатите две години активно се соочуваше и работеше на намалување на ваквите предизвици со кои што се соочува земјоделството и руралниот развој во нашата земја, преку јакнење на капацитетите на локалните здруженија и индивидуалните земјоделци, развој на дигиталните вештини и електронската комуникација во руралните средини, создавање на цврста соработка и плодна соработка со општините, но и на зајакнување на економската активност на жените и младите во руралните средини и практикување на родовата еднаквост. Ваквите достигнувања на завршниот настан беа изнесени низ опсежна видео приказна која што ги опфаќа убавините на земјоделските краеви, но и која што говори како со граѓански ангажман може да се создадат позитивни промени во локалната заедница кои што имаат потенцијал да водат до одржлив рурален развој.

“Успеавме да ја креираме првата мерка за поддршка на жените од руралните средини преку работната група за родова еднаквост и економско зајакнување на жените во руралните средини која што е формирана во Министерството за земјоделство, шумарство и водостопанство, активно бевме вклучени во изработката на бројни закони од областа, а успеавме да дефинираме и 3 заложби кои што ќе го унапредат квалитетот за живот во руралните средини, а кои што и официјално се дел од Националниот акциски план за Отворено Владино Партнерство. Го отворивме првиот женски рурален е-пазар “Наша тезга“ како одговор на пандемијата со Ковид 19, а го основавме и локалниот центар за поддршка на е-владеење во општина Кичево, што пак значи дека локалното население ја има целокупната логистичка и техничка поддршка кога станува збор за електронската комуникација со институциите и на таков начин придонесуваме кон реализација и на Дигиталната агенда на државата, спомена Лилјана Јоноски, како извршна директорка на Рурална Коалиција.

Дарко Белески, пак како раководител на секторот за локален економски развој во општина Кичево, го истакна значењето на соработката на општината со граѓанските организации особено гледајќи го низ призмата на постигнување на поголема транспарентност и отчетност на општината, како и директен придонес на сите локални чинители во развојот на општината. “На нас соработката со граѓанските организации ни е клучна затоа што граѓанските организации се тие кои што ги носат идеите, тие кои што вршат притисок на нас како локални власти и единствениот начин како да придонесеме кон развојот на локалната заедница и руралните средини кај нас е токму преку создавање на отворена и долгорочна соработка со локалното население, граѓанските организации и приватниот бизнис сектор, а во насока на изнаоѓање на заеднички инвестиции и решенија за потребите на граѓаните кои што ќе бидат од интерес на сите!“

Токму во таа насока и заврши настанот за промоција на резултатите на работењето на Рурална Коалиција во изминатите 2 години, односно со официјализирање на иницијативата за формирање на Локалната Акциска Група Треска која што ќе делува на територијата на општините Кичево, Пласница и Македонски Брод вклучувајчи ги сите чинители, а беше претставена и стратегијата за локален економски развој на руралните средини на трите општини што пак ќе биде и главната нишка преку која што ќе се продолжи одржливото работење и делување на Рурална Коалиција.

Изминатите 2 години планот за работа на Рурална Коалиција беше поддржан со институционален грант на Цивика мобилитас.

Цивика мобилитас е програма на Швајцарската агенција за развој и соработка (СДЦ) за поддршка на граѓанското општество во Македонија, која ја спроведуваат НИРАС од Данска, Македонскиот центар за меѓународна соработка (МЦМС) и ФЦГ од Шведска

 

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.