Во Гевгелија ќе има работилници за пишување сценарио за филм за кандидати од ова општина но и од Богданци

258

На 10 и 11 ноември, во организација на здружението „Аквариус“ во Домот на културата во Гевгелија ќе се одржат работилници за пишување сценарио за заинтересирани кандидати од општините Гевгелија и Богданци во рамките на новата платформа „МАТРИЦА“. Станува збор за работилници кои ќе ги водат режисерките Лидија Мојсовска и Елеонора Венинова кои зад себе имаат продуцирано повеќе краткометражни филмови и добитнички на награди на повеќе филмски фестивали

Според програмата предвидено е на работилниците да се зборува за тоа како да се раскаже приказната, поточно својата приказна, потоа што е сценарио, а што е синопсис, ќе се зборува за форматот и структурата на сценариото, но ќе има можност и за пишување свои синопсиси кои ќе се презентираат вториот ден.

Инаку, во рамки на работилниците ќе има и проекции на филмови и секако дискусија за нив, а на крајот и можност за прашања и впечатоци. Искуството, како што велат од здружението, е многу позитивно од Скопје и од Куманово, каде што се виде дека младите навистина имаат интерес, само проблемот е што има многу малку можности да зборуваат за филмската уметност во текот на школувањето. Ментори на работилниците за филмските критики, кои веќе работеа со младите автори и со средношколците, се долгогодишните новинарки и филмски критичарки, Сунчица Уневска и Гена Теодосиевска.

Една од важните цели на „МАТРИЦА“ е и фокусот на раскажувањето приказни, односно подготовка на сценаријата, што се покажува како доста слаба, ако не и најслаба карика во работата на еден филм во нашата земја, а секако и развојот на критичната мисла, која речиси тотално изгуби на значење, иако факт е дека без тоа нема одење напред, ниту создавање зрели дела, компетентни автори и слика за тоа каде сме и каде одиме. Целта беше и е да се вклучат што повеќе партиципиенти, од различни области и од другите градови, бидејќи филмската уметност не е сконцентрирана само во Скопје.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.