Ана Витанова Рингачева од Струмица прогласена за Европска жена на годината оти пренесува љубов за македонскиот јазик !

1128

Професорката Ана Витанова Рингачева од Струмица е прогласена за Европска жена на годината. Таа денеска признанието го доби од канцеларијата на ЕУ во земјава за нејзиното залагање за промоција на традиционалните вредности, всадувањето љубов кај младите за македонскиот јазик . Нејзината номинација стаса од Европската куќа од Струмица но и од Амбасадата на Шведска од земјава заради ентузијазмот што го има Ана Витанова Рингачева за важноста од негување на културните и уметничките традиции.

Таа денеска се опиша како „споделување“ бидејќи контуинирано споделува знаење за македонскиот јазик

,,Ја работам најблагодарната професија во светот а тоа е професорската и да се биде учител е споделување љубов и тоа е за мене животна мисија. Да споделувам знаење за убавиот ми  македонскиот јазик , научни вистини за нашиот јазик кој е предлошката на најкомпактната, питома, европска цивилизација а тоа е словенската. Споделувам љубов кон книжевноста оти мајчиниот – македонскиот јазик е метафора за мојата и за нашата сушност. И ако ме прашате дали постојат мали и големи јазици, ќе го цитирам Митко Маџунков и ќе кажам не постојат, бидејки малите јазици се како птиците во дрвјата. Иако се невидиливи – пеат“ кажа Витанова Рингачева

Таа своето обраќање го заврши со стиховите на Блаже Конески

„До каде што сум ја пренел мојата љубов, до таму е мојата татковина“

Ана Витанова Рингачева е професорка на Катедрата за македонски јазик и книжевност на Филолошкиот факултет при Универзитетот Гоце Делчев Штип. Таа е автор на над педесетина стручни и научни трудови, рецензии, осврти, критики. Автор е на повеќе книги но и добитник на годишната награда на Струмица како и на други книжевни награди.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.