30 дена притвор за гевгеличанецот осомничен дека силувал и тепал другарка на негов роденден

3180

Јавен обвинител до Основниот суд во Гевгелија достави предлог за определување мерка притвор за лицето осомничено дека повеќепати ја силувал другарката на неговиот роденден. Предлогот на Обвинителството е прифатен и на лицето му е определен притвор во траење од 30 дена, информираа попладнево од Обвинителството.

Како што појаснуваат, одлуката е донесена бидејќи постојат околности што го оправдуваат стравот дека осомничениот ќе се даде во бегство, ќе ја попречува истрагата со влијание врз сведоците и оти ќе го повтори или ќе го доврши кривичното дело. Лицето е осомничено за кривично дело „силување“ од член 186 став 3 во врска со став 1 од Кривичниот законик за што доби кривична пријава од полицијата.

,,На 19 декември, осомничениот со употреба на сила и сериозна закана дека непосредно ќе нападне врз нејзиниот живот и врз животот и телото на нејзините родители, ја присилил на обљуба оштетената, со која другарувале и се познавале повеќе години наназад. Тие се договориле да се сретнат, бидејќи на осомничениот му било роденден. Тој ја зел оштетената со автомобилот и ја однел кај тениското игралиште лоцирано кај поранешната касарна во Гевгелија, каде почнал да ѝ зборува дека ја сака. Кога оштетената го одбила,  станал агресивен, ја фатил со двете раце за вратот и започнал да ја дави од што оштетената изгубила свест. Кога се освестила, со возилото биле стигнати пред местото викано „Динќот“, па бидејќи осомничениот возел побавно, оштетената ја отворила вратата и побегнала надвор од возилото и почнала да бара помош,, велат од Јавното Обвинителство.

Како што е наведено во соопштението, во близина немало никој, па осомничениот го запрел возилото, излегол надвор и кога ја стигнал, почнал со боксови да ја удира по лицето, во пределот на главата и очите. Од ударите оштетената повторно паднала во бессознание, по што осомничениот ја ставил во возилото и ја однел во викендица во селото Конско, сопственост на неговото семејство.

,, Бидејќи пружала отпор, почнал да ѝ се заканува дека нема да излезе жива од таму, дека ако каже на некој, ќе ги убие нејзините родители и нејзините другарки, а заканите ги изрекувал држејќи секира до него. Потоа извршил обљуба врз неа неколку пати, па ја запалил нејзината облека и телефон за да ги прикрие трагите. Ја натерал да му вети дека нема да го пријави, по што ѝ дал друга облека од викендицата и ја оставил пред куќата во која живее,, додаваат од Обвинителството.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.