14 негуватели ќе даваат помош и нега на стари лица во нивните домови во општините Василево и Ново Село

256

Од април идната година 14 негуватели ќе пружат помош и нега на стари и изнемоштени лица во општините  Василево и Ново Село како дел од проектот за подобрување на социјалните услуги на Министерството за труд и социјална политика и Црвениот крст Струмица, за што се потпишаа договори за грантови за развој на социјални услуги. По седум лица од овие две општини ќе се обучуваат овој период за да стекнат вештини и знаења како да обезбедат медицинска поддршка но и помош при секојдневните обврски на повозрасните лица за што ќе бидат платени од  самиот проект во рок од една година.

Во овие две општини се  детектирани голем број на повозрасни  и изнемоштени лица кои немаат услови за престој во домови за стари лица. Лицата што ќе се обучуваат по добивањето на сертификати ќе треба минимум една година да имаат теренски посети и да ја дават потребната помош на ова категорија на граѓани што ќе биде од голема корист.

,,Зголемениот број на стари и знемоштени лица кои од низа причини живеат сами, отсуството на установи за социјална заштита како што се старечки домови и дневни центри, тешкиот пристап до формални и неформални услуги, односно набавката на храна и лекови, потребата од плаќање на сметки, само ја комплетираат сликата за секојдневието на овие наши сограѓани. Беше и сеуште е предизвик како институција да понудиме решение и да обезбедиме помош во надминување на констатираните состојби. Сигурен сум дека резултати ќе има. Помошта во вид на услуги, граѓаните на кои им е неопходна, ќе ја имаат во својот дом, што значи ќе им овозможиме без да се откажат од сигурноста на својот дом, да продолжат да водат независен живот во заедницата’’, објави градоначалникот на Василево Марјан Јанев

Проектот предвидува во двете општини  Василево и Ново Село да се адаптираат простории за инфо канцеларии каде ќе има преставници на Црвениот крст за реализација на проектот.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.