Сеуште е нејасно дали ќе има пари од унгарскиот кредит за Општина Струмица. Општината на повикот на Владата конкурирала со проектот изградба на градскиот пазар во непосредна близина на поранешен Агрокор. Но Струмица заедно со уште неколку други општини во земјaва се одбиени по што градоначалникот на Струмица Костадин Костадинов остро реагираше на социјалните мрежи.
..Средствата кои ни се кратат нам како струмичани се околу 140.000.000 денари. Истите тие пари директно од џебот на секоја струмичанка и струмичанец од градот и од секое наше село ќе бидат користени да се враќа унгарскиот кредит. Ќе бидеме задоволни доколку истиот износ од 140 милиони денари се насочи за научни истражувања во МАНУ, нека имаат зголемен буџет, нови лаборатории, барем да ја ублажиме неправдата,, објави на ФБ градоначалникот Костадинов
Премиерот Христијан Мицкоски пак кажа дека Општина Струмица не требало да конкурира со веќе започнат проект, но подвлече дека како Влада ќе го продолжат рокот до 15 ти ноември па ја повика општината да конкурира со нов проект.
„Па мислам дека Општина Струмица не доби затоа што конкурираше со проект којшто веќе е почнат и проект којшто веќе има избран изведувач, којшто е во тек. И апелирам еве до раководството на Општина Струмица да ја искористи можноста до 15-ти ноември да поднесе нови проекти коишто би можеле да ги финансираме.
Костадинов за Сител најави дека како Општина ќе аплицираат со нов проект.
Град Скопје, Струмица, Сарај и Теарце се четирите општини што не добија државни пари за реализација на локални проекти. Ќе бидат финансирани проекти на 77 општини со вкупна вредност од 65 милиони евра. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
