Струмичкото јавно транспортно претпријатие ,,Струмица транспорт“ месецов склучи договор за набавка и поставување на полначи за електричните автобуси кои се очекуваат да стасаат во Струмица за профункционирање на јавниот градски превоз. Станува збор за шест полначи за електрични автобуси и тоа пет од моделот Ида Лого Дуо AC Смарт 10.1 2x22kW и еден полнач Ида Лого Дуо DC Смарт 10.1“ 160kW во вкупна вредност од 14 031 970 денари со ДДВ или 228 илјади и 162 евра.
Тендерот го доби фирмата ,,Електроелемент Стојмир“ ДООЕЛ Скопјe која била единствената што се јавила на распишаната јавна набавка на ЈП Струмица транспорт и полначите треба да бидат доставени во рок од 90 дена. Дрнка МК изврши увид во склучениот договор каде е наведено дека 20 % од вредноста ќе се плати авансно по склучувањето на договорот, 40 % во рок од 10 дена по целосно извршената достава и монтажа на полначите а остатокот во рок од 30 дена по претходната исплата.
Инаку до септември, во Струмица треба да се достават пет електрични автобуси со капацитет од 47 патници кои ќе бидат од марката ISUZU NOVOCITI VOLT. Станува збор за автобуси кои ќе бидат долги околу осум а широки околу два и пол метри. Другите пет треба да се достават за година и половина од потпишувањето на договорот во март годинава. Автобусите се во вредност од околу 430 милиони денари или околу 7 милиони евра.. Набавката ќе биде од „Аутомакедонија“ АД Скопје со финансиски лизинг од „Шпаркасе лизинг“. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
