Актерката на струмичкиот театар Јасмина Вучкова ја понесе наградата за најдобра женска споредна улога на 28 то издание на МТФ ,,Денови на комедија“ – Куманово 2025. Така одлучи жирито на фестивалот во состав: претседател Александар Ивановски и членовите Дубравка Киселички, Петар Андоновски, Гергана Трaјкова и Стефан Јакимовски. Вучкова наградата ја доби за толкување на ликот Наталија во комедијата „Петок 13-ти“ од Жан Пјер Мартинез во режија на Никола Ристов.
,,Наградата е еден вид јавно признание за креацијата која си ја направил. Можеш да имаш одлична креација и без да се здобиеш со наградно признание. Кога се настапува на фестивал секој како потајно да се надева дека ќе добие награда. Но, ние ја игравме претставата на фестивалот пред 8 дена и јас заборавив на наградите. Кога ми се јавија да ми соопштат бев затечена, пријатно изненадена“, ни изјави Јасмина Вучкова
Годинава на репертоарот беа 11 претстави на театри од Македонија, Србија и Бугарија. Фестивалот траеше до вчера а претставите се играа во Центарот за култура „Трајко Прокопиев“ во Куманово.
,,Комедијата како жанр треба да биде присутна на секоја сцена. Многу работи полесно се кажуваат и возприемаат кога се кажани на комичен начин. Така, ние можеме да зборуваме на различни теми во претставата и комичната линија да ја исплетаме низ внатре и темата која сакаме да ја наметнеме за размислување ќе биде многу полесна за возприемање кај публиката. Од друга страна пак, секој сака да се насмее. Како би се чувствувал човек ако денот му помине без насмевка? Комедијата и те како е потребна на театарската сцена“, вели Јасмина . ( В.Трајков)
фото: НУЦК „Трајко Прокопиев“ во Куманово.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
