Во Струмица се одржа вториот управувачки состанок на партнерите вклучени во проектот „CulTour Crossing Borders“ во кој партиципира и Завод и Музеј Струмица. Станува збор за проект финансиран од Програмата за Прекугранична соработка со Грција а со кој ќе се ревитализираат Римските терми кај Бања Банско кои треба да добијат заштитна кровна челична конструкција, потпорни ѕидови, патеки за движење на посетителите во термите и фотоволтаици кои ќе го снабдуваат локалитетот со електрична енергија.
На состанокот присуствуваше и првиот човек на Струмица Петар Јанков кој на ФБ објави дека проектот вклучува компонента на на реставрација и ревитализација на Римските терми во Банско и дека со новата инвестиција се очекува развој на туризмот. Објави дека го радува вклученоста на Националната установа Завод за заштита на спомениците на култура и Музеј Струмица и нивната заложба да се изгради одржлив модел на развој, кој ќе донесе долгорочни придобивки за сите вклучени заедници.
„Денес и при посетата на локалитетот, потврдивме дека со оваа инвестиција не само што го зачувуваме нашето културно наследство, туку создаваме и нови можности за развој на туризмот, економски напредок и подобрување на квалитетот на живот на локалното население. Општина Струмица силно ги поддржува иницијативите кои придонесуваат за зачувување на културното наследство, развој на туризмот и зајакнување на регионалната соработка“, објави Јанков
Дрнка МК во лани во декември објави дека станува збор за проектот „Антички Европос – Дојранско Езеро – Римски терми Банско: Преминување на границите за одржлива култура и туризам“ во кој освен струмичкиот вклучен е и музејот од Кукуш Грција и Цис Палермо до Скопје. Вкупната вредност на проектот за македонската и грчката страна изнесува 1,3 милиони евра од кои за македонската страна се предвидени околу 420 илјади евра. Проектот треба да се заокружи до август 2027 година. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
