Штрајкот продолжува сѐ додека не се договориме со надлежните и додека не потпишеме спогодба. Ова на денешната прес-конференција го рече првиот човек на СОНК, Јаким Неделков, кој истакна дека Советот на СОНК денеска констатирал дека вчерашните владини заклучоци не водат кон усогласување на ставовите, туку напротив, се врши силен притисок врз штрајкувачите.
– Советот на СОНК веднаш ќе го прекине штрајкот, доколку до септември годинава, односно до изминување на шест месеци од носењето на минималната плата, истата ќе се усогласи со градските колективни договори како што е впрочем предвидено во Законот за минимална плата. А за волја на вистината, до денешен ден, ниту еднаш не е испочитуван овој закон. Бараме интензивирање на преговорите во коишто ќе има конструктивни предлози и час поскоро ќе се усогласат ставовите со МОН и со МТСП. Конечниот договор ќе се регулира со спогодба со којашто ќе бидат опфатени сите точки од споменатите прашања меѓу двата социјални партнери. Во кратки црти, штрајкот ќе продолжи сѐ додека не се договориме со надлежните и не потпишеме спогодба – истакна Неделков.
За понудените 10 проценти покачување на платата од страна на Владата, Неделков забележа дека се бетонирани и дека не се остава дополнителен простор за договор по ова прашање.
– Овој процент на зголемување е дури и помал од предлогот на еден од синдикатите којшто предлага и којшто веројатно ќе успее во тоа без ниту еден ден штрајк да добие повисока понуда, односно 2.800 денари линеарно – рече Неделков.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
