Одбојкарскиот шампион Струмица 47&72 со победа ја стартуваше и втората фаза од првенството каде се наоѓаат најдобрите шест екипи по есенскиот дел или првата фаза. Со 3:0 во сетови одбојкарите на Струмица го надиграа Рабонички кој пружи силен отпор за што зборува и резултатот по сетови (26:24, 25:23, 25:16).
,,Доминираме од самиот старт! Со убедлива победа од 3:0 ја започнавме оваа полусезона! Честитки до сите играчи за одличната игра, уживавме да гледаме и да се радуваме од трибините! Одиме понатаму со уште поголема мотивација!“, објавија од клубот чиј сениорски тим е без пораз оваа сезона.
Освен Струмица и Работнички во втората фаза се и екипите на ланскиот Куп освојувач Штип УГД, Борец од Велес, Шкендија и Универзитет Тетово. Овие екипи ги пренесоа бодовите од првата фаза и ќе разигруваат по двокружен бод систем за пласман во полуфиналето на плеј-офот. Првите четири екипи на табелата ќе продолжат за шампионска титула а останатите две го завршуваат натпреварувањето.
Одбојкарите на Струмица и годинава се фаворити за нова титула. Тие деновиве во својот табор го донесоа канадскиот примач Најџел Нилсен кој за клупскиот сајт на ОК Струмица кажа дека ќе даде се од себе за добар успех сезонава. (М.К.)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
