Странските засилувања на македонскиот шампион ОК Струмица – Хамди Бен Талеб и Саад Ом Хени од Тунис, како и засилувањето Учена Офоха од Канада немаат право да настапат на квалификациониот турнир од ЦЕВ лигата на Шампиони во Бургас Бугарија. Вакво известување стаса од ЦЕВ и покрај известувањата на Управата на ОК Струмица предводен од Владо Милев дека се завршени сите работи околу нивната регистрација и уплата пред турнирот.
„Сакам да ве информирам дека и овогодинешниот настап во најелитното натпреварување на клупско ниво во одбојкарската ЦЕВ Лига на шампиони ќе настапиме со проблеми односно без дел од нашите странски засилувања. За разлика од минатата година каде во првото коло од ЛШ игравме во Холандија без нашите играчи од Русија поради одбивањето на нивните визи за Холандија поради политички причини, овојпат настапуваме без играчите од Тунис – Хамди Бен Талеб и Саад Ом Хени, како и без засилувањето од Канада – Учена Офоха поради административни причини. Нивното регистрирање во ЦЕВ трансфер системот и покрај сите мои напори каде јас и моите блиски соработници успеавме да го завршиме вчера на ден пред официјалните натпревари и добија зелено светло во системот, сепак во списокот за натпреварите на овој турнир не беа одобрени ( наша претпоставка е задоцнето плаќање на трансфер сертификатите кои беа платени од наша страна во текот на вчерашниот ден , чекаме официјален одговор од ЦЕВ за причините),, пишува Милев
Милев во својата писмена изјава до јавноста, најави оставка од функцијата претседател на ОК Струмица бидејки никој во државата не го препознава ОК Струмица како клуб кој професионално работи и освојува титули со години а поддршката изостанува. Како што наведува Милев се борат со обезбедување на ветените а неисплатени средства во клупската каса, нереализиран ваучер од АМС и низа други структурални проблеми во одбојкарскиот спорт во државата.
,,А зошто доцневме со плаќањето на трансфер сертификатите е прашањето кое треба сите да си го поставиме. Јас и луѓето околу мене во клубот знаеме какви напори се вложуваат за да можеме да го уновчиме ваучерот од АМС каде 30% од ваучерот е сеуште ненаплатен и незнам дали и како ќе го наплатиме во вакви услови и ваков систем, како и колку молби се испратени и до општинските власти која општина го поддржува нашиот спорт но дали е доволно и дали навремено се уплаќаат средствата каде неколку пати е нагласено дека не чека учество во ЛШ и средствата се итни , не знам, тоа е друга тема на разговор. Сепак мојот напор и како играч – репрезентативец и како претседател на клуб кој сака да се развива и да инвестира во нашата младина која треба да ја изведеме на прав пат, со потпишани договори за соработка со најдобрите европски академии за одбојка, Јастрзебски Вигел од Полска и Јунаитед Волеј од Белгија, изгледа се залудни. Не сме доволно препознаени па затоа преку настапите во ЛШ сакаме да ги отвориме очите на релевантните институции и да докажеме дека можеме да се натпреваруваме против најдобрите екипи во Европа и да победуваме, како што и минатата година на домашен терен го победивме шампионот на Холандија – Динамо Апелдорн.
Со колкав буџет располагаме и какви напори се вложуваат од сите членови на нашиот клуб за да ја постигнеме нашата цел, знаеме сами, но не е проблем и подетално да го објасниме. Ќе заврши и овој наш настап во ЛШ, веќе минатиот викенд го почнавме и домашното првенство и еве ги повикувам сите симпатизери на одбојката да повелат на домашните натпревари уште следниод викенд да погледнат во какви услови и против какви екипи се натпреваруваме во домашното првенство, па после се прашуваме зошто нашиот спорт е деградиран. Се формираат екипи кои едвај се составуваат за да имаат доволен број играчи за да се одржи натпреварот, само и само да се дојде до ваучер кој е лимитиран, и наместо да се поддржат вистинските работници, нашиот ваучер се дели на не знам колкав број делови. Вака не знам дали може да се функционира, па затоа и ја најавувам мојата оставка како претседател на клубот затоа што вака јас не знам да функционирам. Револтот кај мене и кај играчите е огромен. Наместо после европското првенство во одбојка оваа година каде бевме и ко – организатори да напредуваме и да го искористиме моментот да привлечеме што повеќе млади да спортуваат, да привлечеме нови спонзори и.т.н, ние се соочуваме со безброј проблеми, ладни сали од каде што исто така ќе бидеме наскоро избркани бидејќи доцниме со наплатата на средствата па пропорционално на тоа и ние доцниме со плаќање на истите каде огромен дел од нашиот буџет оди за таа ставка и каде исто така е посебна тема за разговор.
Струмица е единствена во Македонија која некако го одржува нивото и рејтингот на одбојката во Македонија за што сведочи и бројот на репрезентативци кој го даваме секоја година, а и резултатите кои ги постигнуваме во европските натпреварувања. Кога ние веќе не гледаме излез од оваа ситуација во која се наоѓа одбојката во Македонија, да знаете дека после нашето згаснување ќе згасне и машката одбојка во Македонија,, стои во писмената изјава на Владо Милев.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
