Со цел за брза и координирана акција, денеска, на иницијатива на градоначалникот Коста Јаневски е формирано Координативно тело во кое членуваат претставници од сите релевантни општински и државни институции и претпријатија, како и претставник на Здружението за заштита на правата и интересите на трговците „Фер Есап“, за справување со последиците од пожарот во Трговскиот центар „Глобал“.
На првиот состанок, се донесени следните заклучоци:
1.Денеска започна истражната постапка и по нејзиното завршување веднаш ќе се пристапи кон расчистување на опожарениот дел на Трговскиот центар „Глобал“.
2.Преку претставникот на Здружението за заштита на правата и интересите на трговците „Фер Есап“, дадени се насоки до правните субјекти кои беа зафатени од пожарот, во меѓувреме да формираат стручна комисија за проценка на штетата, согласно единствената методологија за проценка на штети од елементарни и други непогоди.
3.Здружението за заштита на правата и интересите на трговците „Фер Есап“, ја презеде обврската за отворање посебна наменска сметка – фонд за солидарност.
4.Направени се контакти со сите правни и физички лица кои самоиницијативно се пријавија за помош, но и фирми кои по наши проценки можат да придонесат за што побрзо расчистување на остатоците од големиот пожар.
Сочувствувајќи со сопствениците на објектите кои претрпеа загуби, заеднички е констатирано дека ќе се направи се што е во рамките на надлежности и можности на институциите, за да се стави во функција Трговскиот центар „Глобал“.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
