Во петок во Домот на културата во Струмица премиерно ќе биде прикажан филмот ,,Утре наутро“ во режија на струмичанецот Јани Бојаџи. Филмот кој веќе дигна огромна прашина кај македонската јавност е закажан во 20 часот и веќе билетите се пуштени во продажба. Тоа беше и поводот за кусо интервју со режисерот Бојаџи кој тврди дека филмот кој е политичка драма ќе предизвика ,,прочистување“ кај гледачите после настаните од 27 април 2017 бидејки како што вели тој ,,после 27 Април ова веќе не е истата земја а ние не сме истите луѓе!“
Дрнка.МК портал : Бојаџи филмот ,,Утре наутро“ има премиера во Струмица што очекувате?
Јани Бојаџи: Очекувам средба со публиката, овој пат со мојата, публиката од градот од кај што тргнав во ова одисеја наречена правење уметност! И мора да бидам искрен, имам трема, важно ми е да се случи настан, да се случат емоции, да се случи катарзис. Важно ми е што ќе го споделам ова пред луѓе кои ме познавале и кога не сум бил Јани Бојаџи! Важна ми е таа средба со самиот себе си. Затоа што Струмица е другата страна од мене, колку и да не сум човек кој е носталгичен кон родниот град. Сепак, кога разговарам со себе си, а тоа е голем дел од денот, разговарам на струмички, така да, навистина за мене ова струмичка премиера е емотивно најважниот настан од приказната наречена Утре науто.
Дрнка.МК портал : Може ли да прецизираме за каков филм всушност станува збор
Јани Бојаџи: Утре наутро е жанровски филм и припаѓа на жанрот политичка драма. Сакав да направам филм во жанрот наменет за публика во кино сали или за телевизија и платформи, каде што луѓето гледаат филм. Утре наутро не е уметнички филм. Утре наутро не е филм направен за да му се допаднеме на некој фестивал или на филмски критичари и некои влијателни луѓе во светот на филмската уметност во Македонија и по светот. Утре наутро е филм правен да и се допадне на публиката. Ако воопшто постои можност некој кој прави филмови да знае што е тоа што ќе и се допадне на публиката во моментот додека се прикажува тој филм? Нема таков човек. Но, важно е човек да знае, кога нешто прави, за што и за кого го прави тоа нешто?! Едноставно кажано, направивме филм со кој идентификација ќе има гледачот што ќе дојде во кино салон. Најпосле, филмот зборува за настани што се случија пред седум – осум години. За оние кои не знаат – Утре наутро е филм за настаните од после оној кобен датум за Македонија 27 Април 2017 година. За мене, 27 Април 2017 е исто што и 2 Август 1903, затоа што после 27 Април ова веќе не е истата земја а ние не сме истите луѓе! Утре наутро е филм за нас и нашите трауми од насилството што тогаш го преживеавме а кое според мене сеуште трае. Во општеството и внатре во секој од нас
Дрнка.МК портал : Колку од оваа Ваше филмско остварување може секоја индивидуа да си донесе свој заклучок и одговор на прашање
Јани Бојаџи : Уметноста, филмот посебно, како најпопуларна уметност не дава одговори на прашања кои се лични. Но филмот „Утре наутро“ е направен за да создаде катарзис, прочистување кај гледачот после гледањето на филмот. За мене тоа е единствено важната работа што уметноста треба да ја создава кај луѓето – да предизвикува духовно и телесно прочистување. Сите други очекувања од уметноста се бесмислени и водат кон разочарувања
Дрнка МК портал: Може ли филмот да донесе некоја промена кај луѓето, заедицата
Јани Бојаџи : Јас сум на чисто дека светот на уметноста не може да го промени реалниот свет. Но може да не промени нас. А тоа не е мала работа. Напротив, оној кој себе си ќе се промени, на крајот ќе го промени и светот. Оној кој што ќе тргне по патот на себеменувањето одејќи по тој пат ги менува и луѓето и заедницата кои ги среќава низ тој процес на одење низ животот. Јас човечкото постоење и човечката заедница ја разбирам само како едно постојано движење и едно постојано менување. Човекот нема никаква друга цел освен да се движи и да се менува. Само оние поединци и оние заедници кои се во движење и во промени преживеале. Јас бескрајно верувам дека ние како луѓе и како заедница ќе се промениме и ќе опстанеме. Верувам дека Утре наутро не е метафора, туку аксиома!
Дрнка.МК портал : За крај зошто струмичани да дојдат во петок и која е пораката што сакате да ја упатите
Јани Бојаџи : Струмичани треба да дојдат и да уживаат во една приказна која ќе ја препознаат како своја. Струмичани треба да дојдат и да се видат себе си, луѓето и светот околу нив. Не знам дали е ова порака, ама ете, ако треба да упатам каква и да е порака, тогаш тоа нека биде порака за верување во тоа дека „Утре наутро“ ќе биде подобро од денеска. Дека утре наутро сите ние ќе бидеме подобри од денес
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
