Ниту една грешка на СДСМ не е толку голема за да го оставиме ВМРО-ДПМНЕ да нè понижува и потценува. Ниту една грешка на СДСМ не е толку голема за да го оставиме ВМРО-ДПМНЕ да нè враќа назад како држава.
Ова го истакна д-р Венко Филипче на вечерашниот митинг на СДСМ и Коалицијата за европска иднина во Радовиш од каде повика граѓаните да ја согледаат ситуацијата и на 8 мај да одлучат – дали Македонија треба да остане на стратешкиот колосек и која е алтернативата што ја нуди ВМРО-ДПМНЕ.
„Со вашиот глас против не ја казнувате СДСМ, туку ја наградувате ВМРО-ДПМНЕ. И доделувате неограничена моќ која тие најдобро знаат како да ја злоупотребат. Веќе започнаа со заплашувања и реваншизам и нема да престанат тоа да го прават“, истакна Филипче.
Филипче повика на единство во партијата бидејќи кога СДСМ не е единствен тоа значи загрозена иднина за државата, исто како во 2006 година, потсети тој.
„Тоа значи власт предводена од ВМРО-ДПМНЕ без контрола, насилна власт која ќе злоупотребува и гази сè пред себе. Ова не го кажувам за да заплашам никого. Ова го кажувам затоа што во ВМРО-ДПМНЕ нема суштинска промена. А кога нема суштинска промена не може да се очекува различно владеење“, рече Филипче.
Филипче не гледа искреност ниту во понудата на поранешниот сопартиец Максим Димитриевски и ЗНАМ туку препознава наратив излезен од штабот на ВМРО-ДПМНЕ.
„Ваквата понуда е очекувано да биде одбиена од кое било раководство на партијата. Таа е направена со цел да биде одбиена. Нема чесни намери во делувањето на Максим Димитриевски кон СДСМ или членовите на партијата за кои наводно го болело срцето. Неговиот предлог, кој повеќе личи напишан во штабот на ВМРО-ДПМНЕ, е само алиби да ја оправда коалицијата со ВМРО-ДПМНЕ, во која е ефективно уште од 2021 година“, рече Филипче и додаде дека вистинските социјалдемократи не бегаат и не се обидуваат да ја поделат СДСМ.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
