Утре, сабота, 11 мај 2024 година ќе се одржи Традиционалната литија со иконата на Пресвета Богородица Брзопослушница во Струмица. Свештената литија ќе тргне веднаш по завршувањето на Светата Божествена Литургија со која ќе началствува Митрополитот Тетовско- гостиварски г. Јосиф во сослужение на Епископот Делчевско – каменички г. Марко и Епископот Стобиски г. Јаков.
Светите мошти на Свети Василиј Велики, Свети Стефан Првомаченик и Свети Гаврил Епископ Велички ќе бидат изнесени за поклонение и целивање на верниот народ. На плоштадот ќе биде извршен Молебен во чест на Пресвета Богородица, по што иконата ќе биде однесена во храмот на Свети Вмч. Димитриј и Свети Григориј Палама каде што наредните десетина дена верниците ќе може да се поклонуваат пред Пресвета Богородица Брзопослушница пред да биде однесена во храмот на Светите Петнаесет Тивериополски Свештеномаченици.
Пред седум години, во втората недела од Великиот пост, посветена на свети Григориј Палама, заштитникот на Струмичката епархија, иконата беше донесена во манастирот „Светите Петнаесет Тивериополски свештеномаченици“, Струмица, како подарок од братството на светогорскиот манастир Дохијар.
Струмичката Православна Епархија ги поканува сите верни да дојдат во градот на славните Тивериополски свештеномаченици и да го споделат со сите ова духовно ликување заради благодатното присуство на Богомајката, Која преку Својата чудотворна икона „Брзопослушничка“ ја посети Струмица и изобилно го излеа Својот благослов врз нашата земја.
САБОТА 11.05.2024г- Храм на Свети Димитриј и Свети Григориј Палама
7.45 часот- Утрена служба
8.15 часот- Пречек на архиереите
8.30 часот- Света Божествена Литургија
10 часот – Свештена литија со иконата Пресвета Богородица Брзопослушница и молебен на градскиот плоштад „Гоце Делчев“
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
