Томе Спасов од Пиперево и официјално е назначен за нов раководител на подружницата на АД „Водостопанство“ во Струмица – подружница „Струмичко поле“. Станува збор за дипломиран земјоделски инженер кој во наредниот период ќе треба да стави акцент на консолидација на подружницата и управување со водните ресурси во струмичкиот регион. Најголем предизвик и понатаму ќе биде одржување на хидросистемите Турија и Водоча со каналските мрежи, како и санација на дефектите кои се појавуваат на каналските линии.
Спасов се заложи за поголема транспарентност на подружницата во Струмица со оглед на големиот број земјоделци во регионот односно нивно навремено информирање за сите случувања со АД Водостопанство подружница Струмица но и за хидролошката состојба и можноста за наводнување на засеаните површини.
Инаку АД Водостопанство, односно подружницата во Струмичко поле е одговорна за акумулациите Турија, Водоча, Маркова река, Иловица, Новоселка, Чаушица. Од браната Водоча има затворен, додека од Турија отворен систем за дотур на вода до обработливите површини. Затворен систем има и од браните Маркова река и Чаушица.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
