Ристе Николов од Струмица е глувонемо лице кое како бебе на 6-месечна возраст го изгубил слухот и гласот. Денес, како сопруг, татко и претседател на Здружение на глуви и наглуви лица од Струмица, храбро се справува со сите секојдневни предизвици и неподносливи бариери. Најголема поддршка е неговата сопруга Неда — еден од двајцата лиценцирани толкувачи во целиот регион во кој живеат скоро 150.000 жители.
„Замислете да влезете во општина, а никој да не ве разбира. Јас познавам многу случаи каде глувите лица морале да одат со членови на семејството за да им помогнат, затоа што немаат официјален толкувач. Или уште полошо – ако глуво лице е жртва на насилство, како ќе пријави?“ – прашува Ристе.
Ристе вели дека низ оваа приказна сака да бидат сфатени како се чувствуваат луѓето како него, тие кои имаат желба да комуницираат како и сите останати, но не може да бидат разбрани. Да ја разберат борбата што секојдневно ја поминуваат, судирајќи се со комуникациски бариери.
Тој додава дека како општество на ова поле многу затајуваме, за разлика од околните држави кои се далеку понапредни од нас и имаат бројни позитивни примери и практики. Пред сѐ, вработување на толкувачи по институциите, како помош за глувите и наглувите, користење на современи технологии, вклучително и во приватниот сектор.
„Можете ли да замислите каква емоционална и психолошка загуба претставува неможноста за комуникација со најблиските, а истовремено и со другарите во училиште, на работа, по институциите…? Има наглуви лица кои живеат во руралните средини и тие можеби се единствените глуви или наглуви во нивната заедница, што го прави уште потежок предизвикот да изградат пријателски односи и да се вклучат во општествениот живот“, објаснува Ристе.
Целата сторија може да ја прочитате ТУКА
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
