Струмичката и гевгелиската болница овие денови добија донации со кои значително ќе се подобри опременоста на овие две здравствени установи. Болницата во Струмица доби донација од Хуманитарното здружение „Хикуде“ преку радовишката транспортна фирма Зиго шпед додека во Гевгелија од групацијата Новоматик.
Хуманитарното здружение „Хикуде“, предводено од Марта Реитер по втор пат донира во Струмица. Овој пат додели 31 кревети-електрични со нови душеци, 8 детски бокс креветчиња за новороденчиња, 4 електрични колички за инвалидизирани лица, помагала за движење, 20 колички за инвалиди, ортопедски гипсери, униформи за вработените, постелнина.
Гевгелиската болница пак доби донација од компанијата „Новоматик“ која е членка на Асоцијацијата на приредувачи на игри на среќа (АПИС), а во чиј состав е и Казино „Фламинго хотел“- Гевгелија. Донираше болнички кревети и дезинфекциони средства во вредност од 40.000 евра
На доделувањето на донацијата од страна на менаџерот на „Фламинго“, Александар Савиќ, присуствуваа градоначалникот на општина Гевгелија, Сашо Поцков, и директорот на Општа болница Гевгелија, д-р Митко Крџев.
Директорот на Општа болница Гевгелија, д-р Митко Крџев, изрази благодарност што оваа донација доаѓа во едно специфично време на пандемијата од коронавирусот и е многу значајна бидејќи се состои од 10 најмодерни електронски кревети, секој во вредност од 2.500 евра, кои ќе се распоредат во сите одделенија на болницата, и со тоа ќе ги подобрат условите на престој на пациентите во Општата болница. Исто така добиени се и огромни количини на дезинфекциони средства кои ќе послужат во спречувањето на ширењето на коронавирусот во просториите на Општата болница.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
