Струмичката библиотека „Благој Јанков Мучето“ почна да носи бесплатно книги до сите читатели кои не можат да ја посетат установата и подигнат книга за читање. Станува збор за нова услуга наречена ,,Библиотека на тркала“ во која се вклучени и волонтери. Тие со електрични велосипеди разнесуваат книги до повозрасни лица, болни и изнемоштени и лица со инвалидитет кои се членови на библиотеката но не се во можност да ја посетат и земат книга.
,, Идејата беше дека книгата треба да стаса до секој читател и дека пречките не треба да бидат проблем. Откако добивме донација електрични велосипеди од семејството Александар и Љопче Илиеви со нашите волонтери ја воведовме оваа услуга. Сакаме да се приклучиме на агендата на ОН, 2030 тата да биде година на зелени библиотеки,, ни изјави Гонце Запрова Анастасова виш библиотекар од струмичката библиотека.
Десетици граѓани од Струмица и регионот досега станаа корисници на оваа бесплатна услуга кои претходно се јавуваат и нарачуваат книги за читање при што добиваат инфо кога ќе им биде доставена истата. Волонтерите потоа со велосипедот ,,Велко“ ги доставуваат книгите до посакуваната дестинација.
,,Оваа услуга не е само за читателите од Струмица туку и од населените места во струмичкито регион, независно дали ќе биде од Василево, Босилово, Иловица или Штука. Наша интенција е да ја доближиме книгата и во руралните средини на што ќе ставиме акцент во наредниот период,, потенцираше Запрова Анастасова
Струмичката библиотека за месецот на книгата планира по струмичките населени места повторно да организира карвани за читање преку кои да се презентира библиотекарството но и значењето на читање книга. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
