„Сакаме да дишеме чист воздух“, скандираа струмичани на протестот што се одржа во центарот на Струмица, изразувајќи го својот револт поради, како што велат, институционалната негрижа за високите концентрации на штетни ПМ честички во воздухот. Токму поради ова, Струмица често се наоѓа на врвот на листата на најзагадени градови во земјата.
На импровизираната бина се обратија граѓански еко-активисти, кои го искажаа своето незадоволство од неагилноста на институциите и од меѓусебното префрлање на одговорноста. Според нив, неопходна е итна акција, бидејќи Струмица не смее да биде заложник на профитери и капацитети кои, како што рекоа, горат сè и сешто.
„Бараме шест нови индикаторски мерни станици, шестрачни мерачи за воздух за инспекторите, како и специјализиран дрон за мерење на загадувањето. Бараме вработување на пет инспектори за животна средина, ревизија на издадените А и Б дозволи и елаборати за животна средина, зголемен буџет за заштита на животна средина, обезбедување средства за акредитирана лабораторија, поставување камери на дивите депонии, како и отчетност на сите инспектори“, изјави од говорницата Оливера Аризанова-Мансбарт од граѓанската иницијатива „Здрава котлина“.
Организаторите на протестот ги повикаа пратениците од Струмичкиот Регион да иницираат итни измени на Законот за индустриски емисии, со бришење на одредбите што дозволуваат деловна тајна во процесите на емисија, што според нив претставува законска можност за прекумерно загадување. Дополнително, побараа воведување законска обврска сите компании со А и Б дозволи да воспостават автоматски, континуиран мониторинг на емисиите, со постојана јавна достапност на податоците за загадувањето што го испуштаат. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
