Општина Струмица го пушти во употреба новиот парк со зелена инфраструктура во населбата Карпош, реализиран во рамките на проектот „Зелен пулс во прекуграничниот регион“, финансиран од Европската Унија преку Интеррег-ИПА Програмата за прекугранична соработка со Република Бугарија, а спроведен од страна на Одделението за меѓународна соработка и европски фондови.
Станува збор за современ урбан зелен простор изграден на површина од 12.712 м², на локацијата на поранешната касарна, во непосредна близина на детската градинка „Виножито“. Проектот има вкупна вредност од 390.000 евра и претставува значајна инвестиција во подобрување на квалитетот на живот и урбаната средина во градот.
Паркот содржи уредени пешачки патеки поплочени со природен травертин, тревни површини од речиси 10.000 м², како и богато хортикултурно уредување со 460 дрвја и растенија од различни видови. Просторот е опремен со модерна урбана опрема, енергетски ефикасно LED осветлување и фотонапонски систем со соларни панели, кој овозможува целосно автономно напојување и е 100% независен од електроенергетската мрежа.
Со оваа инвестиција, Општина Струмица продолжува да вложува во создавање современи и одржливи јавни простори, со што директно се подобрува квалитетот на живот на граѓаните. Реализацијата на проектот е во согласност со европските насоки за одржлив развој и придонесува за подобрување на условите за живот, почист воздух и поздрава животна средина за граѓаните.
Градоначалникот на Општина Струмица, Петар Јанков, изјави дека oвој парк е место каде што децата ќе играат, младите ќе се дружат, семејствата ќе создаваат спомени, а граѓаните ќе уживаат во поубава и поздрава Струмица.
„ Создаден е парк на површина од 12.712 м² со 1.628 метри пешачки патеки од природен травертин, богати тревни површини, централна декоративна жардинерија и внимателно избран хортикултурен концепт. На овој простор се засадени 460 украсни и автохтони дрвја и растенија. Секое дрво е симбол на нашата одговорност кон идните генерации.Паркот е опремен со енергетски ефикасно ЛЕД осветлување и соларен фотонапонски систем, што го прави пример за современо, одржливо и еколошко урбано планирање.“, истакна Јанков.
Изведувач на градежните работи беше компанијата „Жикол“ од Струмица.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
