Марко Кренков ученик во прва година при СОУ ,,Јане Сандански“ од Струмица се закити со сребрен медал на 18 тата Јуниорска Балканска олимпијада по информатика што се одржува во Ларнака Кипар. Второто место го освои во конкуренција на 33 натпреварувачи од Босна и Херцеговина, Бугарија, Кипар, Грција, Молдавија, Романија, Србија и Словенија.
Марко Кренков беше дел од македонскиот тим во кој Владимир Грчев од Кочани освои бронза а Зоран Илијоски од Кичево и Јаков Грујовски од Скопје добија олимписки пофалници. Станува збор за натпревар во програмирање за ученици на возраст до 15,5 години од земјите на Балканот.Тие решаваа алгоритамски проблеми во текот на два натпреварувачки дена. Македонскиот тим го предводеа лидерите, д-р Миле Јованов и д-р Емил Станков од Факултетот за информатички науки и компјутерско инженерство (ФИНКИ).
Инаку четирите членови на македонскиот тим за Балканската олимпијада беа избрани преку целогодишен циклус на натпревари кој континуирано го организира Здружението на информатичарите на Македонија. Натпреварите се одвиваат преку системот mendo.mk, достапен во текот на целата година за сите заинтересирани натпреварувачи.
,,Горди сме на секој од нашите натпреварувачи – не само поради освоените медали, туку и поради сериозноста, посветеноста и професионалниот настап што го покажаа во текот на целата година и на самото натпреварување. Нивниот резултат е знак дека во следните години ќе имаме силни тимови и на сениорските натпревари како Интернационалната и Балканската олимпијада. Ние неуморно продолжуваме да работиме со младите таленти. Нашата цел не е само освојување на медали, туку создавање генерации кои ќе продолжат да го развиваат дигиталниот и технолошкиот екосистем на земјата“ изјави Јованов.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
