Наспроти изнесеното во постот дека фотографијата е снимена на 12 октомври 2022 година, таа е снимена на 16 јуни годинава и објавена на Бизнис Вајр. Компанијата на 16 јуни годинава објави дека претседателот на Украина, Зеленски,им се обратил на глобалните технолошки иноватори во 3Д видео, продуцирано со помош на волуметричка технологија на фирмата Еверкоаст. Во постот оваа фотографија е претставена во комплетно поинаков контекст од оној во којшто оригинално е снимена и објавена
Рецензираме пост објавен на социјалната мрежа Фејсбук во кој се вели:
12.10.2022. Зеленски изгледа не е веќе во Киев.
Под овој опис објавена е фотографија од претседателот на Украина, Володимир Зеленски, на којашто тој се наоѓа во просторија со зелена позадина која личи на студиски простор, опкружен со студиска опрема.
Наспроти изнесеното во постот дека фотографијата е снимена на 12 октомври 2022 година, таа е снимена на 16 јуни годинава и објавена на Бизнис Вајр.
Во постот што го рецензираме, оваа фотографија е претставена во комплетно поинаков контекст од оној во којшто оригинално е снимена и објавена. Имено, компанијата Бизнис Вајр, на 16 јуни годинава објави дека претседателот на Украина, Зеленски,им се обратил на глобалните технолошки иноватори во 3Д видео, продуцирано со помош на волуметричка технологија на фирмата Еверкоаст.
Зеленски им се обратил на водечките бизнисмени, инвеститори и сопственици на корпорации преку 3Д видео коешто за првпат било емитувано на форум во Лондон како обид да се соберат на едно место највлијателните иноватори да донираат финансиски и технолошки ресурси за да почне да се обновува Украина. Видеосистемот на фирмата Еверкоаст, ја снимила адресата на Зеленски во Киев во 3Д, за да понуди ново искуство, коешто може да се гледа преку кју ар код достапен на следниот линк.
Кога со мобилен телефон ќе се скенира овој код, претседателот Зеленски се појавува на екранот во 3Д форма и зборува за тоа дека во Украина треба да следува дигитална трансформација и повторно обновување на земјата, за што пример е и самото 3Д видео. Зеленски ги охрабрува највлијателните иноватори во светот да донираат финансиски средства и технолошки ресурси за да започне обнова на Украина.
Украина е шансата за глобална дигитална револуција, шанса за секоја технолошка компанија и шанса за секој визионер, да ги покажат нивната вредност, способности, технологии и амбиции, рече тогаш Зеленски.
Ова негово обраќање е презентирано на четири од европските најголеми фестивали за технологија, во Стокхолм, Лондон, Амстердам и Париз. Неговиот холограм, исто така, во живо е прикажан на самитот за технологија во Даблин и во Берлин.
Опремата користена во создавањето на ова видео, е донирана за украинската влада. Проектот е креиран од Мартин Вилијамс од Тејлсмит, Томас Хоег од Гарден Студиос, режиран од Мартин Вилијамс и продуциран од Марк Рајт од Тејлсмит. Фирмата Еверкоаст овозможува нова ера на содржина и комуникации во форма на 3Д дигитални луѓе. Тие овозможуваат снимање и емитување на висококвалитетни, 3Д волуметрички видеа кои се користат во виртуелната продукција, за мобилни телефони и виртуелна реалност.
Во постот што го рецензираме, овој настан од јуни 2022 година, е претставен во сосема погрешен контекст. Во постот се тврди дека Зеленски веќе не е во Киев, а како доказ за тоа се презентира фотографијата каде тој се наоѓа во студиото при создавањето на 3Д видеото кое беше широко емитувано ширум светот. Невистината дека Зеленски избегал од Украина почна да се шири уште од почетокот на војната. Тогаш Зеленски ги деманрираше овие шпекулации, па се појави и во видео во живо заедно со своите колеги политичари од Киев и кажа: „Тука сме ние“.
И покрај тоа што Зеленски редовно се обраќа на јавноста од неговата канцеларија во Киев, невистината дека Зеленски ја напуштил Украина продолжува да се пропагира, честопати од страна на канали кои пропагираат проруски наративи. Како и да е, фотографијата во постот каде Зеленски е пред зелена позадина е извадена од контекст за да се манипулира јавноста дека тој го напуштил Киев.
Зеленски остана во Киев во текот на воената инвазија на Русија врз Укриана и на 10 октомври 2022 година постираше видео на Телеграм од Киев, им кажа на Украинците да останат во скривниците и се заблагодари на војската.
Поради сите горенаведени факти оценуваме дека не е вистина дека Зеленски веќе не е во Киев, а видеото во постот кој го рецензираме е извадено од контекст за да се пропагира таа невистина.
Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
