Здружението „Од станица до граница“ од Гевгелија го реализира проектот „Моја приказна – мој медиум“ за унапредување на медиумската писменост кај учениците од основно и средно образование. Во пректот се вклучени СОУ „Јосиф Јосифовски“ од Гевгелија, основните училишта „Ристо Шуклев од Негорци, „Климент Охридски“ од Миравци, „Кирил и Методиј“ од Стојаково и „Кочо Рацин“ од Нов Дојран.
Проектот „Моја приказна – мој медиум“ е насочен кон создавање информативни содржини од руралните средини. Со ова учесниците учат како се создава новинарски текст, видеоприлог и како истите се пласираат во јавноста.
Досега се одржани 12 новинарски работилници и создадени 22 новинарски статии, информации и интервјуа, шест едукативни мемиња за родителите и две видеа со насоки за потребата од медиумската писменост и препознавањето на лажните вести.
Во тек е подготовката на театарската претстава „Лажни вест – грешки чести“ во режија на професорката Даниела Џишева, а која е плод на досегашните искуства на учениците од секојдневното нивно користење на медиумски содржини и користење на дигиталните алатки. Претставата ќе биде прикажана во руралните средини во регионот.
Целта на проектот е учениците од руралните средини подобро да ја разбираат улогата на медиумите, професионалните стандарди во новинарството, етичките стандарди, како и да се насочат во креирање медиумски содржини (новинарски текстови и видео – прилози) кои ќе нудат добри примери за општеството.
Со проектот беа формирани четири мини-редакции во основните училишта во Негорци, Миравци, Стојаково и Нов Дојран, а во наредниот период ќе се реализира и посета на еден национален медиум.
Проектот се реализира преку Регионалната програма „Нашите медиуми: Акција на граѓанското општество за поттикнување на медиумска писменост и активизам, спротивставување на поларизацијата и промовирање на дијалог“ се спроведува од страна на партнерските организации: СЕЕНПМ, Медиацентар од Сараево, Албанскиот медиумски институт, Црногорскиот медиумски институт, Советот за етика во медиумите на Косово, Македонскиот институт за медиуми, Новосадската школа за новинарство, Мировниот институт од Љубљана и Бианет (Турција), со финансиска поддршка од Европската Унија.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
