Состојбата со пандемијата со Covid – 19 во општина Валандово е непроменета и алармантна. Ова е ставот на општинскиот кризен штаб кој повторно заседаваше при што донесе повеќе заклучоци и побара поголема ангажираност на сите чинители во заштита на здравјето на сите жители во општината. Според последната податоци, во ова општина од почетокот на епидемијата евидентирани се 51 лице кај кои бил откриен вирусот при што 15 лица се оздравени а во моментов има 36 активни случаи како во Валандово така и во населените места од општината, при што заболени се лица со различна старосна граница.
Општинскиот кризен штаб побара максимална институционална вклученост на сите чинители во борбата против Covid – 19 и дословно спроведување на пропишаните протоколи и мерки од страна на надлежните институции но и мапирање на потенцијални кластери за ширење на коронавирусот во општината. Меѓу другото побараа зачестени контроли на МВР и надлежните инспекторати низ општината во поглед на носење маска, одржување дистанца и забрана на секакви групирања или забави. Апелираат и до граѓаните за целосно почитување на пропишаните мерки и протоколи од надлежните институции и крајно одговорен пристап со цел заштита на сопственото и здравјето на останатите.
Како заклучок се донесе и редовна дезинфекција на детските градинки, училиштата, приватните претпријатија и јавните институции а ТППЕ Валандово и ЈП Комунален сервис – Валандово да продолжат со редовна дезинфекција на улиците, тротоарите, парковите и останатите јавни површини во општината.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
