Oпштинскиот штаб за заштита и спасување, на вечерашната седница, на која заседаваше градоначалникот на општина Гевгелија и командант на ОШЗС, Андон Сарамандов, расправаше во врска со епидемиолошката состојба на подрачјето на општина Гевгелија објави општина Гевгелија на својата веб страна. Согласно податоците, моментално во општина Гевгелија официјално се регистрирани околу 260 позитивни случаи. Меѓутоа, надлежните тврдат дека реалната неофицијална бројка е многу поголема и алармантна.
Во КОВИД-Центарот се хоспитализирани 16 пациенти, од кои шест од нив се со тешка клиничка слика и во критична состојба, кои поради преполнетост на капацитетите на клиниките во Скопје, не можат да бидат транспортирани и соодветно третирани. Исто така, во моментот има пациенти од општина Гевгелија со тешка клиничка слика кои се сместени во КОВИД- Центрите во Скопје, од кои тројца се на респиратор. Оценувајќи дека епидемиолошката состојба на подрачјето на општина Гевгелија е значително влошена.
На седницата беа донесени повеќе заклучоци и мерки. Општинскиот штаб за заштита и спасување апелира до граѓаните доследно да ги почитуваат и применуваат заштитните мерки од КОВИД-19 (носење заштитна маска, редовна дезинфекција на раце и површини, како и одржување на соодветно растојание во затворен простор).
Во наредниот период, за време на претстојните прослави на слави и имендени по повод верските празници да не се организираат масовни собири. Надлежните општински и државни органи да ја засилат контролата на примената на мерките и протоколите за заштита од Корона вирусот.
Општинскиот штаб им препорачува на организаторите – Гевгелиското архиерејско намесништво и граѓаните, кои утре ќе присуствуваат на традиционалното фрлање на Светиот крст во реката Вардар, да ги почитуваат заштитните мерки и протоколи од КОВИД-19.
Пред почетокот на второто полугодие, во сите училишта да се изврши дезинфекција на просториите, а редовна дезинфекција да се изврши и во сите детски градинки во општина Гевгелија.
Сите економски оператори, јавни и други установи кои вршат продажба и други услуги на граѓаните (продавници, супермаркети, банки) да ја засилат контролата и доследно да ги применуваат заштитните мерки.
Превозниците и учесниците во јавниот автобуски сообраќај и такси-превозот доследно да го применуваат протоколот за превоз на патници, како и примената на редовна дезинфекција.
Општинскиот штаб за заштита и спасување констатира дека одлуката која вчера беше донесена за одложување на стартот на второто полугодие од учебната година за сите училишта, е неопходна.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
