Ликовната уметничка Кристина Зимбакова од Струмица која собира габи и лишаи и од нив прави уметнички дела учествуваше на групната изложба во рамките на 20. Меѓународен симпозиум за габи и текстил кој од 12 до 19 јануари се одржа во Лас Палмас на островот Гран Канарија во северозападна Африка. Таа таму имаше и предавање како една од стипендиските на Меѓународниот институт за бои и габи од САД каде се преставија 92 учесника од 19 земји.
Нејзиниот фокус на предавањето беше ,,Габите во дела од современото сликарство со акцент на процесот за изработка на хартија од габи, како и нејзиниот карактеристичен мозаик од габи. Нејзиното беше едно од трите главни предавања на овој интердисциплинарен светски собир што се одржува на секои три години, а каде земаат учество уметници, инженери и научници чија преокупација се боите за текстил и хартијата добиени од габи.
Во творештвото на 50 годишната струмичанка Кристина Зимбакова се спојуваат сликарството, природните науки и поезијата, а габите и лишаите се најзастапен медиум. Нив авторката ги собира по планините низ Македонија, а добива и ретки и впечатливи примероци од биолози од други континенти. Досега имала 11 самостојни изложби во Македонија, Ирска, Грција и Бугарија, а учествувала на бројни групни изложби низ Европа и САД.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
