Пред Нова година, Министерството за животна средина склучи договор со фирмата ,,Конструктор” од Скопје за реконструкција на системот за водоснабдување во Богданци. Станува збор за договор вреден 250 милиони и 228 илјади денари или околу 4 милиони и 68 илјади евра со кој во наредните три години треба целосно да се реконструира дистрибутивната водоводна мрежа во Богданци.
По распишаната јавна набавка за овој проект, се пријавиле вкупно 6 компании – четири од Скопје и по една од Струмица и Гевгелија. На јавната аукција најдобра цена понудила Конструктор од Скопје со која на 29 декември министерот за животна средина Насер Нуредини го потпишува договорот со управителот на скопската компанија.
Согласно објавените документи на системот за јавни набавки со реконструкцијата ќе се бидат опфатени сите 179 крака од водоснабдителната дистрибутивна мрежа во Богданци со реконструкција на постоечките шахти, хидранти. Паралелно ќе се изврши и замена на околу 2157 приклучоци-водомери со инсталација на нови за далечинско отчитување на потрошената вода.
Според склучениот договор реконструкцијата на системот за водоснабдување во Богданци треба да заврши до крајот на 2025 година а реализацијата на овој проект ќе се плаќа од Буџетот на Министерството за животна средина и просторно планирање.
Градоначалникот на Богданци Блаже Шапов истакна дека во секој момент се очекува да се реконструира секундарната и терцијална дистрибутивна водоводна мрежа во Богданци. Се чека само зелено светло од надзорот на градежните работи.
,, Станува збор за околу 40 километарска водоводна мрежа и по околу 70 години жителите на Богданци ќе добијат нова дистрибутивна водоводна мрежа,, ни изјави градоначалникот на Богданци – Шапов.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
