Градежна механизација на изведувачот ,,Џови компани’’ деновиве работи на чистење на коритото на река Сушица во Радовиш кое треба да биде регулирано и уредено за да се спречи излевање при обилни врнежи од дожд и надојдени води од околните ридови. Станува збор за зафати, во рамките на проектот „Заеднички мерки за спречување и намалување на последиците од катастрофи во општините Сандански и Радовиш“ што го имплементира Центарот за развој на Југоисточниот плански регион и општина Радовиш во партнерство со општина Сандански од програмата за прекугранична соработка со Бугарија.
,, Согласно предвидените активности, прво е изведено чистење на вегетација, жбунови и дрвја со одвоз на материјал до депонија, со што е отпочнато оформување на десната страна на коритото по течението на реката, во должина од 300 метри, со машински широк откоп. Градежните работи на теренот се одвиваат според планот, а во моментот се работи на машински ископ на темел, припрема и изведба на кејски ѕид од ѕидан камен по спецификации дадени во проектот,, објавија од Центарот за развој на Југоисточниот плански регион
Согласно проектот кој треба да заврши до април идната година, ќе се регулира потегот на реката ,,Сушица’’ кој се наоѓа лево од влезот во Радовиш во должина од 624 метри . Ќе се прават каскади, ќе се уредуваат ѕидовите и дното на коритото, ќе се уредува кеј покрај реката кој ќе биде озеленет. Паралелно покрај кејот треба да се постават и канделабри со урбана опрема за прошетка и рекреација.
Основна цел на проектот кој треба да се реализира до април идната година е да ги ублажи последиците од природни катастрофи односно регулацијата на речното корито ,,Сушица’’ во Радовиш треба да го ублажи надојдениот водостој од околните ридови но и да ги ублажи можните последици од поплави во струмичкото сливно подрачје со оглед дека Сушица се влева во реката Струмица.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
