Нивото на водата во акумулациите Турија и Водоча е зголемено во однос на февруари годинава но далеку се од количините што овие две акумулации ги имаа во мај минатата година. Вака соопштија од ,,Струмичко поле“ подружница на АД Водостопанство кои се надеваат на поволни хидролошки услови за да има и се пушти вода за наводнување до обработливите површини во струмичкиот регион.
Во акумулацијата Турија од каде со вода за пиење се снабдуваат општините Струмица и Василево има околу 20 милиони метри кубни вода што е за 11 милиони помалку од мај минатата година додека во акумулацијата Водоча има околу 9 милиони што е за 20 одсто помалку од лани.
,, Со оглед на моментално акумулираните количини на вода, Подружница Струмичко Поле не може да гарантира дека ќе ги задоволи потребите за вода за наводнување на сите корисници, а не можеме да тврдиме дека вода сигурно ќе нема и да не ги посеете Вашите површини. За да имаме успешна сезона за наводнување во акумулација Турија е потребно да се акумулираат барем уште 5-6.000.000 м³ вода, а во акумулација Водоча уште 2.000.000 м³ Доколку ни се повтори минатогодишното лето очигледно е дека моменталната акумулирана количина на вода и во двете акумулации не ни гарантираат дека ќе имаме успешна сезона за наводнување,, соопштија од Струмичко поле до земјоделците.
Деновиве во струмичко постојано има краткотрајни врнежи од дожд, но според упатените тие се минимални количини за да се подобри ситуацијата во двете најголеми акумулации во овој регион. Турија и Водоча кои имаат и свои хидромелиоративни системи се проектирани да наводнуваат околу 13 илјади хектари обработливо земјиште во струмичко.
Лани од Водоча вода за наводнување се пушташе еднаш неделно додека од Турија за време на работните денови. Што се однесува до помалите акумулации Новоселка, Иловчанка, Маркова река и Чаушица тие се полни. (В.Т)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
