За 10 одсто е намален бројот на запишани првачиња во Општина Струмица ова учебна година во однос на минатогoдшната. Ако лани во прво одделение во струмичките училишта зачекориле 556 дечиња, годинава според информациите од Одделението за образование запишани се 492 дечиња. Според раководителот Васил Георгијевски не се очекува некоја поголема промена во бројот на запишани првачиња иако традиционално во септември се запишуваат деца чии семејства се на сезонска работа.
,,Освен во Дорломбос и Мемешли каде со години нема ученици и училиштата се ставени во мирување, прваче нема ниту во Попчево а во Раборци имаме само едно, додека во Рич две првачиња. Она што загрижува се поголемите населени места како што се Добрјеци, Водоча, Костурино, Градско Балдовци, Сачево каде имаме по три првачиња додека во Вељуса каде имаме и Основно училише се запишаа само четири првачиња“, соопштија од Општината за Дрнка.МК
Не е поразлична сликата и по останатите населени места каде има подрачни училишта. Во Баница се запишани 20 првачиња, во Свидовица 6 а Банско 16.
Што се однесува до централните основни училишта најмногу првачиња има во ООУ Сандо Масев во Струмица – дури 137 кои ќе се распоредат во 7 паралелки а во останатите училишта има намалување . Во Маршал Тито во Струмица се запишаа 38, во ООУ Видое Подгорец – 63 а во ООУ Никола Вапцаров во Струмица 73.
Во ООУ Даме Груев во Куклиш 15, во Маршал Тито во Муртино 12, во Герас Цунев во Просениково 23 а во ООУ Кирил и Методиј во Дабиље 10 првачиња..
Според евиденцијата на МВР, бројот на деца кои имаа наполнето години потребни да се запишат во прво одделение изнесува 853 (В.Т)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
