Активистите против отворање на рудникот Иловица денеска со моторизиран протест го изразија своето незадоволство од одлуката на Управен суд кој повторно го врати во игра рудникот на планината Огражден. Околу еден час со вклучени сирени членовите на ,,Здрава котлина’’ и граѓаните кои не сакаат рудник, возеа по струмичките улици со своите возила на кои имаше транспаренти ,,Кој управува со Управен’’ ,,Виш Управен, исправи ја грешката на Управен’’ во знак на револт од фактот што во вонредна состојба, Управниот суд донесе одлука во корист на концесионерот Еуромакс.
,,Сакаме да ја споделиме нашата загриженост од молкот на Министерството за економија и Јавното правобранителство во поглед на очекуваната жалба до Вишиот управен суд чии рокови течат со укинувањето на вонредната состојба. Испративме официјални дописи за заеднички состанок и да доставиме дополнителни правни аргументи,но одговор нема. Со оглед дека е изборна кампања загрижени сме дека ова важно прашање ќе биде оставено на маргините или нема да биде соодветно третирани,, рече Оливера Аризанова Монсбарт од Здрава Котлина
Владата минатата година на компанијата Еуромакс не и даде дозвола за експлоатација за металични минерални суровини а го раскина и договорот за концесија. Таквата одлука ги смири активистите, но одлуката на Управниот повторно ги налути членовите на Здрава Котлина. Еји активистите побараа до 13 јули да се реши проблемот во спротивно ќе ги објават сите поединци од политички партии кои се вклучени во целиот процес и имаат интерес од отворање на рудникот
,,Затоа до 13 јули бараме да се реши проблемот со рудникот и неправдата да ја исправите. Не прифаќаме одложувања. Ако не се реши ние тогаш ќе објавиме архива на документи со поединци но и од политички партии кои се инволвирани во целиот процес ,, рече Оливера Аризанова Мансбарт од ,,Здрава котлина’’ по завршување на протестот од центарот на Струмица
По денешниот протест на еко активистите се огласи и концесионерот Еуромакс. Тој во своето соопштение наведува дека го почитуваат правото на слободно изразување и нагласуваат дека проектот Иловица Штука нема да загадува
,,Проектот за рударскиот комплекс „Иловица-Штука“ е развиен врз повеќегодишни истражувања за влијанието врз животната средина, применувајќи ги највисоките европски и светски стандарди. Оваа најголема директна странска инвестиција во државата нема да ја загадува почвата, водата и воздухот, ниту ќе претставува опасност за здравјето на луѓето. Работејќи заедно, сите ќе докажеме дека во новата ера – Одржливото Рударство и Земјоделство Можат Успешно да Егзистираат Заедно. Проектот ќе создаде илјадници директни и индиректни работни места а од даноците и од другите законски давачки кои Еуромакс ќе ги уплаќа во буџетот, ќе се вложува во подобрување на локалното образование, социјалните програми и здравствената заштита, како и за модернизација на локалната инфраструктура”, се вели во соопштението на концесионерот Еуромакс.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
