Вкупно 165 крвни единици беа собрани на крводарителската акција ,,По патот на Гиго“ што се реализираше во Струмица во организација на Црвениот крст во соработка со Службата за трансфузиона медицина. Во спортската сала при СОУ ,,Димитар Влахов“ во Струмица ред се чекаше да се дарува крв во рамките на акцијата ,,По патот на Гиго“ во чест на Глигор Новачевски Гиго, поранешен член и волонтер во струмичкиот Црвен крст. Акцијата траеше рекордни седум часа. Покрај долгогодишни дарители во акцијата се вкучија и голем број нови лица претежно млади кои за првпат даруваа крв.
,, Станува збор за акција во чест на нашиот колега Глигор Новачевски Гиго кој цели 30 години беше дел од Црвениот крст и беше столб и симбол на пожртвуваноста и хуманоста во организацијата. Радува фактот што на акцијата се приклучија ученици од трите средни училишта во Струмица кои за првпат даруваа и станаа крводарители и даваат сигнал дека хуманоста е пристуна и кај младите. Морам да Ви признам дека за првпат имаме ваква слика. Повеќе време се чека за дарување, отколку времето потребно за дарувањето“, ни изјави Столе Цветков секретар при ОО Црвен крст Струмица
Според најавите, акцијата ,, По патот на Гиго“ ќе стане традиционална и од наредната година ќе биде дел од редовниот календар на крводарителски активности на Црвен крст Струмица
Лани ова организација иницирала и реализирала вкупно 27 крводарителски акции со вкупно 627 кровдарувања. Истите биле во соработка со општини, училишта, граѓански организации, фирми и институции од Струмица. Освен акциите иницирани од општинската организација на Црвениот крст, во Струмица крводарувања спроведува и Службата за трансфузиона медицина. Во 2024 во Струмица се регистрирани 1597 крводарувања.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
