Во текот на вчерашниот ден регистрирани се три пожари во струмичко и гевгелиско во кои интервенирале припадници на противпожарните единици на Струмица и Гевгелија. Во пожарите изгорела површина со пченица, пчеларник но и површини со стрништа и обрасната трева.
Струмичките пожарникари објавија дека вчера во 11.45 часот во атарот на с.Дабиле-струмичко интервенирале со 3 возила и 8 пожарникари – спасители на гасење на запалено стрниште со површина од околу 8 хектари. Пожарот беше локализиран и ликвидиран за кратко време по пристигнувањето и е спречено негово проширување кон блиските куќи и објекти во селото.
Во Полициската станица Струмица пак вчера, било пријавено дека на место викано „Трнки“ во атар на село Пиперево, струмичко, настанал пожар кој зафатил земјоделска површина засадена со пченица. Во пожарот нема повредени лица, а увид на местото извршиле екипа на СВР Струмица и инспектор за пожари. Пожарот изгаснал сам пред пристигнување на противпожарна екипа.
На 14.07.2022, полициски службеници од Полициската станица Гевгелија извршиле службен разговор со В.К. од Гевгелија и В.Х. од Струмица затоа што во 15.10 часот на место викано „Топлик“ – атар на Гевгелија, изведувајќи работи со алат-шлајферица, предизвикале пожар кој зафатил необработена нива обрасната со трева и дел од пчеларник. По интервенција на Територијалната противпожарна единица Гевгелија пожарот бил изгаснат, а повредени лица нема. За настанот бил запознаен Јавен обвинител од Основното јавно обвинителство Гевгелија, а по целосно документирање на случајот ќе биде поднесен соодветен поднесок.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
