ПроКредит во Струмица не е само една од многуте банки во градот, туку е многу повеќе. Таа е дел од традицијата, заедницата и дел од градот повеќе од 20 години. Истовремено, е и синоним за нова ера во банкарството. Без шалтери, без чекање во редици, без непотребни документи, без класичен начин на размислување. Разговараме со Ангел Трајков, Директор на експозитурата во Струмица, за постоењето на ПроКредит во регионот повеќе од две декади, за тоа како изгледа банката што го менува начинот на којшто функционира банкарството и нејзините прогресивни
услуги.
Дрнка.МК: Колку долго постои филијалата на ПроКредит во Струмица и како започна вашата приказна?
Трајков: Ако треба да ја раскажеме нашата приказна, таа започна пред повеќе од 20 години. Филијалата во Струмица е една од првите што ги отвори ПроКредит Банка во Македонија, и од тогаш сме тука. Не само како банка, туку како дел од локалната заедница. Почнавме со млад тим, буквално штотуку излезени од факултет. Немавме банкарско искуство, ама имавме огромна желба да направиме нешто што ќе биде поинакво. Наместо да се држиме до класичните банкарски шаблони, ние тргнавме да го менуваме начинот на кој се работи со клиенти. Во тоа време, малите и микро компаниите имаа многу тежок пристап до кредити. Ние бевме првите што им дадовме шанса – ги посетувавме директно во нивните простории, разговаравме со
нив, ги слушавме нивните потреби. Нашите вработени не седеа зад шалтер, тие беа на терен. Тоа беше нешто ново, нешто што другите банки не го правеа. И токму така започна нашата мисија да ја поддржиме локалната економија од корен. Во 2010 година, нашата филијала прерасна во регионален кредитен центар за целиот југоисток, од Гевгелија, па се до Кочани. Со тоа ги поставивме корените на тоа што ПроКредит е и денес – банка која оди чекор понапред и ги поддржува клиентите во секоја фаза, без разлика дали се приматели на плата, млади професионалци, студенти, млади бизнисмени или етаблирани компании. Она што ни дава дополнителна вредност е и објектот во кој се наоѓа нашата филијала – зграда со богата историја и културно значење за градот. Изградена уште во 1926 година, првично функционирала како хотел „Српски Краљ“. Веќе во 1928 година, пред хотелот бил лоциран и градскиот пазар, што дополнително ја вкоренува зградата во урбаната меморија на Струмица. Од 1950 до 1980 година, објектот бил во функција на продавница за текстил „Нама“, добро позната на тогашните генерации, а во 2008 година започна процесот на реставрација. Денес, објектот е целосно адаптиран за најсовремени банкарски потреби, но со почит кон неговата историска вредност. Навистина сме горди што работиме во простор кој е дел од живото наследство на Струмица.
Дрнка.МК: Во 2016 вие воведовте и нешто сосема ново – Зони 24/7. Каква вредност за клиентите донесе дигитализацијата во банкарството?
Трајков: Уште во 2016 направивме револуција во банкарството во нашата земја – класичните шалтери ги заменивме со самообслужувачка 24/7 зона достапна во било кое време од денот. На почеток морам да признаам дека имаше доза на недоверба – некои клиенти беа збунети, некои дури и отпорни. Беше предизвик. Но, со трпение и посветеност, успеавме да создадеме навика и да го промениме начинот на кој се вршат банкарските операции. За брзо, тоа стана дел од секојдневието на нашите клиенти кои не сакаат да чекаат редици, бирократија, ниту пак комплицирани продукти што не ги разбираат. Тие сакаат транспарентност, брзина и паметни финансиски алатки. Нашите клиенти користат мобилно банкарство и онлајн плаќања што се достапни буквално со еден клик. Со тоа, филијалите прераснаа во центри за поддршка на бизнисите и населението. Наместо шалтери, имаме отворен простор за консултации, места каде што клиентите не доаѓаат да пополнуваат формулари, туку да најдат решенија за нивниот бизнис или лични финансии во директна комуникација со нашите стручни советници за клиенти. Нашата визија е јасна: финансиски услуги кои не губат време, туку создаваат вредност.
Дрнка.МК: Кои се клиентите што денес и ја укажуваат довербата на ПроКредит Банка во овој регион?
Трајков: Кога зборуваме за нашите клиенти, не мислиме само на бројки или на трансакции во систем, мислиме на луѓе. На лица што ги познаваме по име, на семејства што со години се дел од нашата приказна, на претприемачи што започнале со една идеја и денес водат успешни бизниси. Во нашето портфолио доминираат микро, мали и средни претпријатија, токму тие се срцето на локалната економија. Соработуваме со над 600 компании од регионот и над 6.000 физички лица. Во однос на пазарното учество, околу 33% од правните лица во сегментот на микро, мали и средни претпријатија во регионот соработуваат со нас, што значи дека секое трето претпријатие од овој сегмент во Струмица и околината е наш клиент. Тоа ни кажува дека сме на добар пат, но и дека имаме голема одговорност – да продолжиме да се развиваме, да вложуваме уште повеќе во дигитализација и да продолжиме да нудиме модерни услуги. Ние не сме само банка. Ние сме дел од градот. Дел од секојдневието. Дел од оние мали и големи моменти – кога некој отвора нов дуќан, кога некој купува прв стан. И токму затоа, нашата работа не е само во просториите на банката, таа продолжува на терен, на локални настани, во разговори со млади луѓе што бараат шанса.
Дрнка.МК: ПроКредит Банка во Струмица е препознатлива по поддршката на локалните претприемачи. Како ја гледате претприемничката култура во регионот и што правите за да ја поттикнете?
Трајков: Во Струмица постои жив пулс на претприемништво. Многу млади луѓе имаат идеи, енергија и желба да создадат нешто свое. Но, како и во остатокот од државата, често недостасува поддршка, особено кога станува збор за финансиска едукација и пристап до финансии. Токму тука ја гледаме нашата улога. Не само како банка, туку како партнер кој ги води претприемачите низ процесот на градење одржлив и паметен бизнис. Еден пример е програмата „Млади во бизнисот“ преку која нудиме менторство, финансиски совети и пристап до средства што можат да направат вистинска разлика. Веруваме дека парите сами по себе не се доволни, потребна е стратегија, визија и поддршка. Затоа го најавуваме и претстојниот настан за млади претприемачи, кој ќе се одржи на 24-ти (среда) во хотел Етерно во Струмица. Настанот е наменет за сите кои сакаат да научат повеќе за донесување на паметни бизнис одлуки во вистинско време, стратегии за брендирање и вмрежување со други претприемачи и експерти. Сите заинтересирани може да се пријават на следниот ЛИНК. Струмица има потенцијал, а ние сме тука да го поддржиме.
Дрнка.МК: Како ја гледате иднината на Струмица и регионот – каде се движиме, и каде се гледате вие во таа приказна?
Трајков: Иднината на овој регион ја гледаме многу позитивна, со голема надеж, но и со уште поголема одговорност. Струмица има сè што е потребно за да биде двигател на позитивни промени. А, нашето место во таа приказна? Да бидеме тука, со луѓето, за луѓето. Не само за финансиски услуги, туку и за совет, за охрабрување, за нови почетоци. Без разлика дали сте семејство што планира нов дом, што планира да штеди, млад претприемач, или едноставно некој што сака да направи паметен чекор, ние сме тука. Иако сме препознатливи како дигитална банка, со нашето физичко присуство и надвор од главниот град сакаме да ја потенцираме важноста за развој на економијата децентрализирано. Како партнери на населението и бројни локални компании, продолжуваме да ги поддржуваме физичките лица, како и микро, малите и средни бизниси, особено во земјоделието и агро секторот, преработувачката индустрија и транспортот кои се клучни за Струмица и целиот Југоисточен регион.
Нашата визија е да бидеме банка која ги следи најновите банкарски и технолошки иновации, инвестирајќи во модерни решенија и во квалитетот на вработенте со што ги олеснуваме банкарските процеси, а го заштедуваме вашето време. Истовремено остануваме банка која преку индивидуалниот пристап континуирано гради доверба и стабилност со нашите клиенти.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
