Сите 31 парцела за домување од Урбан блок 41/1 во Струмица се продадени. На трите електронски јавни надавања што ги спроведе Општина Струмица по Објавата за отуѓување на градежно земјиште во сопственост на државата за парцелите на местото викано ,,Балабаница“ имало огромен интерес како од физички така и од правни лица. Станува збор за парцели од КП 6635/1 КО Струмица со површина од 249 до 920 метри квадратни кои се наоѓаат на десната страна на влезот во Струмица од кај Радовиш.
Од Општина Струмица потврдија дека сите парцели се продадени и дека просечната откупна цена за квадратен метар изнесува 64 евра што е речиси двојно наспроти нивните очекувања од 35 евра. Инаку за сите парцели парцели почетната цена на електронските јавни наддавања беше евро за квадратен метар.
,,Од она што го разговаравме пред продажбата, некакви анализи со Урбанизмот оти таму има и приватни земјишта како се продавале и од прилика која била просечната цена, очекувањата ни беа дека ако постигнеме 35 до 40 евра во просек би било добро оти стартната е едно евро. Јас сум благодарен не само на тие што купија таму туку и до сите што учествуваа во лицитацијата. Просечната цена по метар квадратен за парцелите за куќи е 64 евра што е потврда дека сите сакаат да инвестираат во Струмица,, кажа градоначалникот Костадин Костадинов
Паралелно на последната мартовска лицитација, продадени се и две парцели во мало стопанство од 2106 и 2934 квадратни метри за подигање објекти од лесна и незагадувачка индустрија, сервиси и стоваришта. За сите парцели во тек е постапката за спроведување на купопрдажните договори. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
