За проблемот на раноградинарите од струмичко Банско ќе интервенира и Министерството за земјоделство шумарство и водостопанство. Од Министерството за земјоделство соопштија дека ќе иницираат средба со Министерствата за животна средина и екологија за да се најде решенија – земјоделците да ја користат геотермалната вода за загревање и наводнување на пластениците.
„ Министерството за земјоделство, шумарство и водостопанство е запознато со настанатата ситуација. Иако не е во наша надлежност, со оглед дека се работи за земјоделци кои се во ек на производствена сезона, Министерството ќе иницира сотанок со МЖСПП и МЕ. Дополнително МЗШВ ќе предложи на владина седница да се актуелизира прашањето со цел земјоделците да не бидат оштетени. Нашиот предлог ќе биде да им се овозможи на земјоделците непречено да произведуваат се до изнаоѓање на решение за ситуацијата, во кое ќе биде запазена и законската рамка но, да не биде загрозено земјоделското производство“, соопштија од МЗШВ.
Во струмичко Банско има над 50 хектари со пластеници под зеленчук кои се греат и наводнуваат од геотермалната вода. Со оглед дека реонот има концесионер за водата, ЕВН почна да не ги продолжува договорите на земјоделците за користење струја со која ја испумпуваат водата од бушотините за пластениците.
Раноградинарите деновиве реагираа бидејки заради немање водно право не им се продолжуваат договорите за користење на електрична енергија за испомпување на геотермалната вода за загревање и наводнување.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
