Жителите на општина Ново Село пред Претседателот на државата, Стево Пендаровски дебатираа и одлучуваа кои проекти имаат приоритетно значење и треба да се реализираат во нивната локална заедница. Пендаровски заедно со Швајцарската амбасадорка, Вероник Улман и постојаниот претставник на УНДП, Армен Григорјан, присуствуваше на третата сесија на Форумот во заедницата, кој се спроведува како дел од програмата „Зајакнување на општинските совети“. Претседателот Пендаровски изрази поддршка за проектот и посочи дека непосредното учество на граѓаните во процесите на одлучување во општините и политиките кои директно ги засегаат, придонесува за јакнење на локалната демократија.
„Учеството на граѓаните во процесот на одлучување во нивните општини е клучно за развојот на демократијата на локално ниво и преставува најдобар начин за канализирање на потребите и желбите на граѓаните. Или како што се вели – ништо за граѓаните, без граѓаните. Нема реален напредок, без локален напредок. Без учество на граѓаните, најпрво во своите заедници, а понатаму и во пошироките општествени процеси, не можеме да зборуваме за демократија и развиена граѓанска држава. Ако процесите не почнуваат од долу кон горе, од основата кон врвот, тогаш е јасно дека политичарите не можат да направат никаква промена затоа што ќе ја немаат поддршката од граѓаните”, истакна претседателот Пендаровски, потенцирајќи ја важноста од вклучување и учество на младите во овие процеси.
Форумите во заедницата се спроведуваат во земјава подолго од една деценија, а како концепт се воведоа во рамки на Швајцарската поддршка на земјава. Во наредните неколку години, граѓаните на вкупно 40 локални самоуправи ќе имаат можност директно да учествуваат на вакви форуми во рамки на програмата „Зајакнување на општинските совети“, која ја финансираат Швајцарската влада и Министерството за локална самоуправа, а ја кофинансира и спроведува Програмата за развој на Обединетите нации (УНДП) во соработка со национални и локални партнери.
„Кога граѓаните се вклучени во процесот на одлучување, кога се информирани за одлуките за распределба на буџетот и подготовка на проекти, тие можат да понудат нови перспективи, идеи и решенија, а со тоа нивната доверба во донесените одлуки се зголемува. Ова води до поефективно владеење и поголемо чувство на припадност кон политиките и иницијативите коишто се спроведуваат во општината“, потенцираше Вероник Улман, амбасадорка на Швајцарија во земјава.
„Форумите во заедницата сега се одржуваат во првата група од десет партнерски локални самоуправи и до средината на мај граѓаните од овие општини треба да ги идентификуваат, подготват и изберат проектите кои се од најсуштинско значење за нивната локална заедница. Потоа, во следните месеци ќе следи имплементација на терен, поддржана со средства од проектот „Зајакнување на општинските совети“ и од соодветната општина. До 2027 година, овој модел ќе се имплементираат во дополнителни 30 општини“, рече Армен Григорјан, постојан претставник на УНДП.
Општина Ново Село е во првата група од 10 партнерски општини, во кои проектот почна да се имплементира минатата година.
„Овие форумски сесии се насока за подобро и потранспарентно владеење со општинската администрација, со внесување механизми по западен терк од развиени и економски стабилни држави. Преку Форумот во заедницата со директно учество на граѓаните, ние како општинска администрација добиваме реална слика за тоа што е најголем приоритет во нашата општина, со оглед на ограничените буџетски ресурси со кои располагаме“, потенцираше Ѓорѓе Божинов, градоначалник на Општина Ново Село.
Во рамки на втората фаза на проектот „Зајакнување на општинските совети“ се реализираат активности за поттикнување на развојот на општините и подобрување на квалитетот на живот на граѓаните во локалните заедници. За остварување на овие цели се работи на унапредување на капацитетите на општинските советници, директно вклучување на граѓаните во носењето одлуки, подобрување на законодавството, дигитализација на услугите, зголемена транспарентност и борба против корупцијата. Едно од клучните начела на проектот е при реализацијата на сите проектни активности во целост да се почитуваат принципите на правична родова застапености и еднакви можности за сите граѓани.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
