Во Младинскиот центар во Струмица се одржа едукативна трибина посветена на машкото здравје под мотото „Препознај, превенирај, делувај!“, во организација на Ротари Клуб Струмица. Присутните покажаа силен интерес за темата, што е доказ дека свесноста за машкото здравје расте во заедницата.
Пред присутните зборуваше д-р спец. уролог Софче Митковска Милкова, која говореше за значењето на редовните уролошки прегледи, симптомите што не смеат да се игнорираат, хормоналните нарушувања, како и современите пристапи во спречување и рано откривање на заболувања на простата. Посетителите имаа можност да поставуваат прашања и да добијат практични совети од стручно лице.
Настанот беше поддржан од Алкалоид АД Скопје, чиј претставник Славче Стојанов присуствуваше на трибината.
„Како Ротари Клуб Струмица, веруваме дека грижата за поединецот значи грижа за целата заедница. Со оваа трибина сакаме да ја подигнеме свесноста за машкото здравје и да ги охрабриме мажите навреме да прават превентивни прегледи, затоа што раното откривање буквално спасува животи. Со овој настан испраќаме порака дека грижата за машкото здравје не смее да се одложува — превенцијата е најсилната алатка која ја имаме“, истакна од Ротари Клуб Струмица
Ротари Клуб Струмица најавува дека ќе продолжи со иницијативи кои го промовираат здравото живеење, превенцијата и информираноста како основа за посилни и поздрави локални заедници.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
