Од најавата на претседателката на Европската Комисија, Урсула фон дер Лајен дека ќе организира конференција за враќање на украинските деца од Русија, оваа објава на Фејсбук прави манипулативна конструкција во која се извртуваат тезите и се воздигнува рускиот претседател Владимир Путин. Тврдењето дека Путин им ги уништил „перверзните планови на педофилите“ за децата од Украина, ја искривува вистинската слика за проблемот со депортацијата на украинските деца од окупираните територии во Русија. Меѓународниот кривичен суд во Хаг, пред десетина дена ги обвини Путин и руската комесарка за правата на децата, Марија Лвова-Белова за воени злосторства поради депортација на украински деца
Рецензираме пост објавен на социјалната мрежа Фејсбук во кој се вели:
Педофиливе ќе си пукнат од мака оти Путин им ги скрати нивните перверзни планови со децата!!!
Во склоп на објавата споделен е напис во кој се известува дека претседателката на Европската Комисија, Урсула фон дер Лајен најавила организирање на конференција за враќање на украинските деца кои беа однесени во Русија за време на војната. Текстот информира дека Лајен во партнерство со Киев, заедно со полскиот премиер Матеуш Моравјецки, повела иницијатива за репатријација на децата присилно однесени во Русија.
За таа цел ќе организираме конференција. Сакаме да извршиме меѓународен притисок да ги преземеме сите можни мерки за да ги пронајдеме тие деца, посочила Лајен.
Меѓутоа, во описот на постот што го рецензираме, од оваа вообичаена информација во којашто е пренесена изјава од претседателката на Европската Комисија дадена на крајот од првиот ден од дводневниот Самит на ЕУ во Брисел, се прави манипулативна конструкција во која се извртуваат тезите и се воздигнува рускиот претседател Владимир Путин.
Прво, важно е да се објасни контекстот на реториката: „педофиливе ќе си пукнат од мака оти Путин им ги скрати нивните перверзни планови со децата“, а која потекнува од Кју анон теоријата на заговор, популарна и во контекст на воената инвазија која Русија ја спроведува во Украина.
Белингкет анализирајќи ги каналите на Кју Анон пишува:
Уште една честа тематика ширум повеќе глобални Кју Анон канали е борбата на Путин против „педофилите“. На пример, Кју Анон канал од Холандија, во септември 2021 година објави дека Холандија е „педо-земја“ (“pedoland”) и Путин е свесен за тоа, споделувајќи на видео на кое Путин кажува дека во Холандија има политичка партија која ја поддржува педофилијата. Ова видео, објавено на Јутјуб во 2014 година со холандски превод, има повеќе од 100 илјади прегледи досега.
Белингкет додава дека на Кју Анон канал од Велика Британија во септември 2021 година се тврдело дека:
Путин откако дошол на власт води битка против сатанистичката кабала на длабоката држава, па поради тоа глобалните медиуми ги прогласија Русија и нејзиниот претседател како „лоши момци“.
Меѓународниот кривичен суд во Хаг, пред десетина дена ги обвини Путин и Марија Лвова-Белова, комесар за правата на децата во Канцеларијата на претседателот на Русија, за воени злосторства поради депортација на украински деца.
Како што објави Гардијан, извештаите кои се појавија минатата пролет укажуваат дека деца од окупираните украински територии се носат во Русија и се посвојуваат од руски семејства. Русија ги презентира овие дејства како хуманитарни мисии за да се спасат украинските деца од војната, но Украина ја обвинува Русија за геноцид и ги опишува овие дејства како воени злосторства.
Меѓу киднапираните деца има одземени од државни украински институции во окупираните територии, деца чии родители се испратени во руски „летни кампови“ од каде никогаш не се вратиле, деца чии родители биле уапсени од руските окупаторски власти и деца кои останале сираци во воените дејства.
Најголемиот дел од нив се од окупирани територии на јужна и источна Украина, регионите Харсон, Харков, Запорожје, Доњецк и Луганск, како и од областа Миколаев.
Русија призна дека има 1.400 деца од Украина кои ги опишува како сирачиња, а подоцна истакна дека 2.000 допатувале до Русија без придружба.
Од почетокот на воената инвазија, барем 400 сирачиња од Украина се посвоени од руски фамилии, според Украинскиот регионален центар за хуманитарни права, кој ова бројка ја темели на изјави од руската федерација. Русија кажа дека уште илјада чекаат посвојување.
Но, многу од овие деца од Украина имаат живи роднини кои очајнички ги бараат, пишува Гардијан.
Што се летните кампови за превоспитување (ре-едукација)?
Најмалку 6 илјади деца од Украина од окупираните области ги посетувале руските летни кампови и неколку стотици од нив никогаш не биле вратени на семејствата. Јејл Универзитетот во студија од февруари ги опиша овие кампови како „реедукациски“.
Според извештајот на Јејл хуманитарна истражувачка лабораторија, од почетокот на конфликтот, бебиња стари и само 4 месеци, коишто живееле во окупираните области, биле однесени во 43 кампови ширум Русија, вклучително Крим и Сибир за „проруска патриотска и воена едукација“ .
Некои родители успеаа да ги вратат поминувајќи го долгиот пат од Украина преку Полска и Балтикот до јужна Русија, пишува Гардијан.
Конвенцијата на ОН за превенција на геноцид забранува присилно пренесување на деца од една група во друга група, а Конвенцијата на ОН за детски права забранува „незаконско пренесување и одбивање да се вратат децата“.
Така што, ситуацијата во која се организира конференција во европските тела за враќање на украинските деца во Украина, нема никаква врска со педофилија од страна на ЕУ или Европската Комисија или нејзини претставници, туку се однесува на нелегалната депортација на украински деца.
Поради сите горенаведени факти, сметаме дека тврдењето во постот дека Путин им ги “уништил перверзните планови на педофилите“ за децата од Украина, е манипулативно и ја искривува вистинската слика за проблемот со депортацијата на украинските деца од окупираните територии во Русија.
Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
