СВР Струмица до Основното јавно обвинителство Струмица поднесе кривична пријава против К.К.(35) и Б.Ш.(64), двајцата од Струмица, поради постоење основи на сомнение за сторено кривично дело „несовесно работење во службата“, како и против И.Г.(54) од Струмица, поради постоење основи на сомнение за сторено кривично дело „злоупотреба на службената положба и овластување“.
Според информациите од полицијата, пријавената И.Г., во својство на раководител на Одделението за администратирање на приходи при Општина Струмица, постапувала спротивно на одредбите од Законот за даноците на имот. Таа во четири наврати ги пречекорила своите службени овластувања со тоа што изготвила решенија за даночно ослободување од данок на промет на недвижен имот при продажба на станови од станбена куќа со наменска класификација А1.
Даночното ослободување било одобрено повикувајќи се на член 25 од Законот за даноците на имот, иако, како што наведуваат од СВР, законските одредби се однесувале исклучиво на станбени згради и станови со класа на намена А2.1, а не на станбени куќи со номенклатура А1.1, за кои биле изготвени решенијата. Дополнително, во три од четирите решенија, И.Г. се потпишала и во полето „потврдил-контролирал“, во отсуство на пријавениот Б.Ш.
Пријавениот Б.Ш., во својство на раководител на Секторот за финансиски прашања при Општина Струмица, како и пријавениот К.К., во својство на градоначалник на Општина Струмица, според наводите, постапиле несовесно при вршењето на своите службени должности, со тоа што пропуштиле должен надзор во постапувањето по предметите и ги потпишале изготвените решенија за даночно ослободување.
Со ваквите дејствија, како што информираат од СВР Струмица, пријавените лица го оштетиле буџетот на Општина Струмица за износ од 668.388 денари.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
