Дел од родителите на децата кои ја преставија Македонија на Европската јуниорска олимпијада по информатика во Молдавија и се закитија со бронза во областа на програмирањето реагираат на игнорантскиот однос на државата за македонските таленти. На социјалните мрежи го изразуваат својот револт за тоа што се оставени сами на себе да ја преставуваат Македонија а се враќаат со одлични резултати.
,,До кога ќе бидете неми за овие деца? Дали не е срамота сами да плаќаат авионски билети за олимпијади каде што ја претставуваат нашата Држава? И дали не заслужуваат мало внимание од Вас? Ве молам преиспитајте се, да не Ви е криво зошто младите бегаат од Македонија, оти ако немате интерес да ги задржите овие деца, зошто да веруваме дека сакате да ги задржите младите во Македонија, како што ветувавте пред да ве гласаме,, стои во објавата на еден од родителите
Бронзени медали за Македонија на ова Европска олимпијада во програмирање за ученици на возраст до 15,5 години освоија Владимир Грчев од Кочани, Никола Стојковски од Скопје и Марко Кренков од Струмица. Тимот беше раководен од лидерите, Владислав Бидиков и Иван Занов од Факултетот за информатички науки и компјутерско инженерство (ФИНКИ).
Реакција имаше и од Здружението на информатичари кои го објавија успехот на тројцата млади иформатичари во Молдавија. Претседателот Јованов подвлече дека Министерството за образование сеуште не дало одговор на нивното барање за покривање на трошоците за патувањето за Молдавија но и за понатамошните активности на овие деца во поглед на натпреварувањето.
,,Се уште чекаме одговор на барањето до МОН за покривање на трошоците за ова патување до Молдавија, како законска обврска на МОН која произлегува од законот за основно образование. Во меѓувреме се подготвуваме за учество на Интернационалната олимпијада во Египет, а најголем дел од нашите напори се за организирање на Балканската олимпијада по информатика на која ние ќе бидеме домаќини од 20-ти до 26-ти септември во Охрид. Бидејќи покривањето на сите трошоци за Балканијадата за над 100 учесници од 15 земји се трудиме да го обезбедиме само со спонзорства, упатувам јавен апел до македонските компании да ни помогнат во организацијата на овој настан“. реагираше вчера претседателто на ЗИМ Миле Јованов ( В.Трајков )
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
