На претстојните Локални избори во Струмица ќе има независна граѓанска листа за советници предводена од Ѓорги Танушев. Станува збор за активисти на Здрава Котлина кои со години се борат здрава животна средина и преточени преку граѓанската иницијатива ,,Стига е“ еднаш веќе беа дел од досегашниот советнички состав. Сега претендираат на повеќе советнички мандати кои ќе носат одлуки во интерес на граѓаните при што најавуваат дека ќе нема никаква коалиција со било кој. Ќе подржат се што е добро а ќе критикуваат се што не чини во Општина Струмица залагајки се граѓаните да учествуваат во креирањето одлуки на локално ниво. Еве го интервјуто со Танушев
Дрнка.МК: Зошто активистите на Здрава Котлина по втор пат ќе учествуваат на Локални избори?
Танушев: Активистите на „Здрава Котлина“ по втор пат ќе учествуваат на локалните избори во Струмица, бидејќи веруваме дека борбата за здрава и безбедна животна средина мора да продолжи и да се пренесе во институциите. Нашата главна цел е заштита на воздухот, водата и земјоделското земјиште од штетни и ризични индустриски проекти, како и создавање услови за одржлив развој и подобар квалитет на живот за сите граѓани на Струмица.
Струмица и понатаму се соочува со најзагаден воздух во Македонија, а постојаното избегнување на контролата на нивоата на сулфур диоксид укажува на висока и широка корупција во институциите. Дополнително, постои сериозна закана за отворање на рудникот Иловица-Штука преку рударска компанија од Радовиш во спрега со локални бизнисмени, заштитени од политички партии.
Нашата примарна мисија, институционално блокирање на рударски концесии, која беше делумно остварена во средината на мандатот на нашите советници, сега е загрозена поради целосните измени на законите за рударство и геолошки истражувања. Клучните законски брани се рушат, подготвувајќи терен за системска рударска офанзива од корпоративни интереси заштитени од државата. Протести и блокади ќе има, веројатно поголеми од досега, но станува јасно дека директното учество во институциите е неопходно за ефективно решавање на проблемите без партиски неутрализации и разводнувања.
Затоа, со учеството на изборите сакаме граѓанската енергија да ја претвориме во институционално влијание. Преку Советот на општината, граѓаните ќе можат директно да влијаат врз носењето одлуки, кои ќе бидат транспарентни, отчетни и секогаш во интерес на јавноста, а не на тесни партиски или бизнис интереси. Во таа смисла надзорната функција што е дело од советничката улога ќе биде особено изразена преку сите советници на Стига Е.
„Здрава Котлина“, преку политичкото крило во нашата платформа „Стига Е“, се појавува како вистинска алтернатива на класичните партии, затоа што нашата работа се темели на активизам, истрајност и независност. Поддршката што ја добивме на претходните избори ја потврди довербата на граѓаните во ново и различно политичко дејствување, ослободено од стари модели и партиски калкулации. Сите партии имаат свои партиски интереси, а искуството со нивното „делување наспроти реторика“ покажува дека не може да им се верува.
Преку повторното кандидирање ја потврдуваме нашата одговорност и посветеност да останеме гласот на заедницата – базиран на знаење и разум, кој се залага за чиста околина, поддршка на земјоделците, заштита на јавното здравје и вистинска демократија преку активно вклучување на граѓаните во процесите на одлучување.
Дрнка.МК: Кој е профилот на кандидатите за советници кои се на листата за Струмица?
Танушев: Советничката листа е составена врз принципи кои обезбедуваат вистинска и суштинска репрезентативност на сите граѓани во општина Струмица, земајќи ја предвид нејзината демографска структура. При изборот на кандидатите се водеше сметка за пропорциите и профилите на советниците за да се обезбеди реално претставување.
Повеќе од една третина од кандидатите се од руралните средини, што е во согласност со фактот дека една третина од гласачите живеат во селата. Но, за да обезбедиме суштинска репрезентативност, секоја трета позиција на листата е резервирана за кандидат од руралните подрачја, што ја гарантира нивната активно присуство и влијание.
Листата ја претставува мултиетничката структура на општината и имаме Македонци, Турци, Срби. Жените се застапени според законските одредби, со акцент да бидат позиционирани во погорниот дел на листата. Старосната структура е избалансирана, комбинирајќи искуство од постарите, младешка енергија од помладите и прагматична продуктивност од средновечната генерација како баланс.
Професионалната структура на кандидатите е разновидна: работници, учители, уметници, доктори, земјоделци, менаџери, бизнисмени, ИТ професионалци, пензионери и други. Заедничко за сите е дека се чесни, одговорни и докажани во своите заедници, подготвени да придонесат кон подобрување на нашата општина.
Ова се имињата на кандидатите од нашата листа, а за време на кампањата ќе обезбедиме детално претставување на нивните профили и програмски заложби.
- Ѓорги Танушев
- Оливера Аризанова-Маннсбарт
- Иван Заев
- Анета Оџакова
- Александар Грчев
- Васил Јованчев
- Борка Грнчарова
- Георги Бајрактаров
- Синан Фетиков
- Јасмина Вучкова
- Гоце Ристов
- Вања Андонова
- Димитар Темелков
- Лидија Давчева
- Ацо Атанасов
- Славица Стојанов
- Благој Патаров
- Соња Мицева
- Санела Дрвошанова
- Горан Станишлевиќ
- Аница Лазаревска
- Бурхан Фетиков
- Кирил Пасков
Дрнка.МК: Единствена независна листа во Струмица, кои се очекувањата на колку мандати претендирате?
Танушев: Ние сме единствената независна советничка листа во Општина Струмица, што ја покажува парадоксалноста, партизираноста и стравот што владее во нашето општество. Како независни советници од Струмица, Босилово, Ново Село и други општини, победивме во спорот пред Уставниот суд поради безобразното покачување на прагот за собирање потписи во изборниот закон. Партиите во парламентот организирано ја направија оваа промена за да ги сопрат независните движења што не ги контролираат.
По нашата победа, спорните одредби се укинаа, а законските услови за лансирање независни листи на локалните избори значително се изменија на послободно учество во цела Македонија и сега се потребни само два потписи, наместо стотици. И покрај тоа, многу од независните листи од локалните избори во 2021 година исчезнаа, а нивните членови се апсорбирани во двете најголеми партии во општината. Единствено ново е што се појави еден независен кандидат за градоначалник, кој не е од нашите редови, но сепак е позитивен исчекор и сигнал дека идејата за независноста не е изгубена.
Ние опстанавме, не се предадовме и не се продадовме. Продолжуваме понатаму, посилни и поискусни. На минатите избори во Турското маало во Струмица, двете големи партии вложија огромни напори за добивање на гласови, но партијата Аваја освои 1000 гласови и покрај тоа што СДСМ и ВМРО вложија сè. Ова покажа дека никој не може да ги контролира гласовите на граѓаните и дека легендата дека партиите знаат за кого се гласа е лажна.
Очекувам да освоиме доволно советнички мандати за Советот да има независна и силна контрола врз секој градоначалник и да може суштински да ја менува Општината, што е неопходно по децении застој од партиските инсталации кои продуцираат неефикасност и пристрастност.
Дрнка.МК: За што ќе се залагате како идни советници?
Танушев: Од досегашната работа во Советот може да се заклучи дека како независен советник успеав да реализирам голем дел од заложбите дадени на претходните избори, што ќе се покаже во рамки на отчетноста во кампањата. Во сите општини каде што имаме наши советници, тие најчесто се директно или индиректно заслужни за заштита на јавниот интерес, во рамките на можностите на еден мандат, преку посветеност и објективност.
Се поддржа сè што беше добро, а се критикуваше и спречуваше она што не беше во интерес на граѓаните. Мнозинството носи одлуки, но граѓаните имаа можност да видат кој како се застапува, кој е активен и какви резултати има надвор од видливите видео материјали од седниците. Зборот на луѓето за активностите и интегритетот на советникот е најдобрата референца, па затоа не беше потребен политички маркетинг изминатите години.
Иако сум само еден советник, успеав да влијаам доволно за да се исполнат поголем дел од заложбите, што не беше лесно, но сега имаме уште поголема обврска да го задржиме и умножиме она што е добро, да елиминираме што не функционира и да формулираме нови заложби базирани на нашите искуства и опсервации.
Нашата цел е Струмица да стане пристојно и безбедно место за живеење: град со чист воздух, без рудници и опасни индустрии, без диви депонии и урбана мафија, без прекумерна употреба на пестициди и загадени води. Сакаме чиста и достапна вода за сите, здрава храна од локалното производство, планиран и уреден урбан развој, транспарентни одлуки и институции кои работат за граѓаните.
Нашата визија за Струмица е одржлив развој во интерес на граѓаните: повеќе зелени и пошумени површини, ефикасно управување со отпадот, силно поддржано земјоделство со органска храна, модерна инфраструктура, велосипедски патеки и јавен превоз достапен за сите. Градот треба да биде пример за урбан развој, со јавни простори, културни и младински активности кои ќе ги задржат младите дома.
Во однос на носење одлуки во Советот, очекувам повеќе дебата и аргументација, особено во услови кога нема мнозинство. Нашите принципи се:
- Неутралност: Одлуките се носат од случај до случај, независно кој ги предлага.
- Поддршка на доброто, отфрлање на лошото: Сите добри одлуки се поддржуваат, сите лоши се одбиваат.
- Транспарентност и интегритет: Сите одлуки мора да бидат аргументирани, транспарентни и јавно проверливи.
Заложбите ќе бидат презентирани во документ-програма што ќе се дистрибуира до граѓаните за поддршка и продолжување на исправната насока.
Дрнка.МК: Успевате ли да им парирате на политичките партии и може ли коалиција?
Танушев: На политичките партии кои постојано спроведуваат анкети веќе им е јасно дека во Советот на општина Струмица ниту една партија нема да има мнозинство, особено ни приближно како досега, кога една партија владееше апсолутно комотно. Фрагментацијата на политичката моќ е неизбежна и во корист на помалите партии и независни кандидати, што од своја страна ќе обезбеди квалитетни одлуки во Советот – за доброто на граѓаните, а не на мала група партиски бизнисмени.
Народот нека избере градоначалник според сопствената желба, бидејќи тоа е извршна функција која директно управува со општинскиот буџет. Меѓутоа, мудро е граѓаните да изберат независна, компетентна и искусна контрола во Советот, која долгорочно ќе биде отпорна на партиски притисоци и манипулации. Во услови на фрагментиран Совет каде никој нема мнозинство, секој градоначалник ќе мора да биде одговорен и отчетен за јавните пари и функционирањето на администрацијата, доколку сака неговите програми и проекти да се усвојуваат без забелешки.
Во однос на потенцијалните коалиции, мојот став е ист како пред четири години и е потврден со дела и гласања во текот на годините. Јавно го повторувам: НИКАКВИ ПРЕДИЗБОРНИ И ПОСТИЗБОРНИ КОАЛИЦИИ НЕМА ДА ИМА СО НИКОГО! Ова е единствениот начин да се заштити јавното добро во интерес на граѓаните и да се спречат партиски и клиентелистички влијанија.
Граѓаните повеќе од осум години ги следат нашите активности на терен, а последните четири години преку „Стига Е“ во институциите на општината. Јасно е дека партиите немаат механизам да нè замолчат или поткупат. Ние сме долгорочно присутни и ќе останеме!
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
