Министерството за социјална политика под итно да го донесе Регистарот на лица со трајна попреченост. Вака апелираат од Здружението на лицата со телесна инвалидитет ,,Мобилност“ од Струмица од каде сметаат дека државата мора да има евиденција на лицата и степенот на попречност. Како што вели претседателката на „Мобилност“ Струмица – Дивна Танев, со овој регистар институциите ќе имаат увид колку и кои лица имаат трајна попреченост и нема да ги малтертира истите да ги обновуваат документите за добивање туѓа нега или додаток за мобилност.
,,Тоа е горливо прашање за нас. Ако регистарот биде изготвен, лицата со трајна попреченост нема да имаат потреба од комисиски прегледи за добивање на туѓа нега или мобилност на секои шест или 12 месеци. Замислете низ какви се перипетии поминуваме за да докажеме пред институциите дека сме со траен инвалидитет и да добиеме надомест од државата. Се малтертираме по институции за да ги извадиме тие документи. Регистарот се работи веќе три години и сеуште не е готов. Конечно мора да се донесе и државата да има јасна слика за лицата со попреченост“, смета Танев
Во Здружението „Мобилност“ Струмица членуваат околу 390 лица со попреченост од Струмица, Василево, Босилово, Ново Село и Валандово. Нема точна евиденција колку се со трајна оти кај нив членуваат лица и со стекната и со вродена телесна и со комбинирана попреченост. Танев смета дека ова бројка не е конечна оти сеуште има по селата лица кои не се мапирани.
Здружението на лица со телесна попреченост Мобилност од Струмица покренаа иницијатива за собирање пари за поправка на комбето старо 10 години за превоз на лицата со попречност кое беше купено со поддршка на Општина Струмица. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
